ئىمام نەۋەۋى | بىر تەيەممۇم بىلەن ئىككى ناماز ئوقۇشقا بولامدۇ؟
ئىمام نەۋەۋى رەھىمەھۇللاھ مۇنداق دېگەن:
بىزنىڭ (يەنى بىزنىڭ شافىي مەزھىپىنىڭ) كۆپچىلىكىمىزنىڭ ھۆكۈمىگە كۆرە، تەيەممۇم نىجاسەتنى يوق قىلمايدۇ. ئەكسىچە، ناماز ئوقۇشنى مۇباھ قىلىدۇ. تەيەممۇ كىشىنىڭ پەرز نامازنى ۋە ئۆزى خالىغان رەۋىشتە نەپلە نامازنى ئوقۇشىنى دۇرۇس قىلىدۇ. بىراق، بىر تەيەممۇم بىلەن ئىككى پەرز نامازنى ئوقۇشقا بولمايدۇ. ئەگەر تەيەممۇم قىلغان كىشى تەيەممۇم قىلغاندا مۇشۇ تەيەممۇم بىلەن پەرز نامازنى ئوقۇشنى نىيەت قىلغان بولسا، بۇ تەيەممۇم بىلەن پەرز ناماز ئوقۇش، ھەم نەپلە ناماز ئوقۇش دۇرۇس بولىدۇ. ئەگەر بۇ تەيەممۇمنى نەپلە ناماز ئوقۇش ئۈچۈن قىلغان بولسا، ئۇنىڭ بىلەن پەرز نامازنى ئوقۇشى دۇرۇس بولمايدۇ. كىشى بىر تەيەممۇم بىلەن بىردىن كۆپ جىنازە نامىزى ئوقۇيالايدۇ. شۇنداقلا، بىر تەيەممۇم بىلەن بىر پەرز ناماز ۋە بىردىن كۆپ جىنازە نامىزى ئوقۇيالايدۇ. كىشى ناماز ۋاقتى كىرىشتىن ئاۋۋال (ۋاقتى كىرىش ئالدىدىكى ناماز ئۈچۈن) تەيەممۇم قىلمايدۇ. سۇ تاپالمىغانلىقى ئۈچۈن تەيەممۇم قىلغان كىشى ناماز ئوقۇۋېتىپ سۇنى كۆرسە، نامىزى باتىل بولمايدۇ (شۇ نامىزىنى داۋاملاشتۇرۇپ ئوقىۋېرىدۇ.) ئەمما، بۇ تەيەممۇم قىلىپ ناماز ئوقۇۋېتىپ سۇنى كۆرگەن كىشىنىڭ نامازنى قايتا ئوقۇشىغا سەۋەب بولىدىغان بىر ئەھۋال بولسا، ئۇ ھالدا سۇنى كۆرۈش بىلەن نامىزى باتىل بولىدۇ. ئاللاھ ئەڭ ياخشى بىلگۈچىدۇر. (سەھىھۇل مۇسلىم شەرھى 3\87) — مۇجتەھىدلەر پەتىۋالىرى تورى تەرجىمە قىلىپ تارقاتتى