دىن ھەققىدە قارا قورساق، بىلىمسىز ھالەتتە ياشاۋەرگەن كىشى گۇناھكار بولامدۇ؟
سوئال: دىن ھەققىدە قاراق قورساق، بىلىمسىز كىشىلەر قىيامەت كۈنى ئۆزى بىلمىگەن مەسىلىلەردىن سوراققا تارتىلامدۇ؟ قارا قورساق كىشىلەرنىڭ دىنىي بىلىملەرنى ئۆگىنىشى پەرزمۇ؟
پەتىۋا بەرگۈچى ئورۇن: ھەرەم ئالىملىرى پەتىۋا ئورگىنى
جاۋاب: كىشىنىڭ دىن ھەققىدە بىلىمسىز، قارا قورساق ھالەتتە قېلىشى دۇرۇس بولمايدۇ. ئۇلارنىڭ ئىسلام ئالىملىرىدىن ھەق دىننى ئۆگىنىشى پەرزدۇر. ئاللاھ سۇبھانەھۇ ۋەتائالا مۇنداق دېگەن:{ئەگەر بىلمىسەڭلار ئىلىم ئەھلىلىرىدىن سوراڭلار.} (سۈرە نەھل، 43-ئايەت) رەسۇلۇللاھ سەللەللاھۇ ئەلەيھى ۋەسسەللەم بۇ ھەقتە مۇنداق دېگەن: ((طلب العلم فريضة على كل مسلم)) «شەرئىي ئىلىم ئۆگىنىش ھەر بىر مۇسۇلمان ئۈچۈن پەرزدۇر.» hedisim.com (ئىبنى ماجە 224؛ مىشكات 86؛ سەھىھ) [ئۆگىنىش پەرز بولغان دىنىي ئىلىم — كىشىنىڭ ئاللاھقا توغرا شەكىلدە ئىبادەت قىلىشىنى روياپقا چىقىرىدىغان تەۋھىد ئىلىمى، ئىسلامدىكى پەرز ئىبادەتلەرگە — تاھارەت، ناماز، زاكات، روزا، ھەجگە ئالاقىدار فىقھى ئىلىم؛ كۈندىلىك تۇرمۇشتا زۆرۈر بولغان سودا-سېتىق، نىكاھ، تالاق فىقھى؛ شۇنداقلا دۇرۇست مۇسۇلمان بولۇش ئۈچۈن زۆرۈر بولغان مۇناسىۋەتلىك دىنىي بىلىملەردۇر.] بۇ ۋەجىدىن، سورىغان سوئاللىرىغا قانائەتلىنەرلىك ۋە توغرا شەكىلدە جاۋاب بېرەلەيدىغان دىنىي ئالىملاردىن سوراش شارائىتىغا ئىگە تۇرۇپ، بۇنداق قىلماستىن دىن ھەققىدە يەنىلا قارا قورساق ياكى خاتا چۈشەنچە ھالىتىدە قالغان كىشىلەر گۇناھكار بولىدۇ. [ئالىملارنىڭ كىتابلىرىدىن ۋە ئالىملارنىڭ ماقالە، ئەسەر، پەتىۋالىرى بار بولغان ئىشەنچىلىك تور بەتلەردىن ئوقۇپ ئۆگىنىشمۇ — ئالىملاردىن سوراش جۈملىسىدىندۇر.]
تەۋپىق ئاللاھتىندۇر. رەسۇلۇللاھقا، ساھابىلىرىگە ۋە ئۇ زاتقا ئەگەشكەن مۆمىنلەرگە سالام ۋە رەھمەتلەر بولسۇن.
پەتىۋا بەرگۈچى ئالىملار: ئەللامە ئابدۇلئەزىز ئىبنى ئابدۇللاھ ئالشەيخ، ئەللامە سالىھ ئەلفەۋزان، ئەللامە بەكرى ئەبۇزەيد (رەھىمەھۇللاھ)