رامزان روزىسىنى قەستەن بۇزۇۋەتكۈچى قانداق قىلدۇ؟
ئىمام مەرۋەزى (ۋاپاتى: 294) «ئۆلىمالارنىڭ ئىختىلاپلىرى» ناملىق ئەسىرىدە بۇ ھەقتە مۇنداق دېگەن:
ئىمام سۇفيان (سەۋرى) رەھىمەھۇللاھ مۇنداق دېگەن: كىشى بىر كۈنلۈك رامزان روزىسىنى قەستەن بۇزۇۋەتسە، بۇنىڭ كاففارىتى ئۈچۈن شۇ بىر كۈننىڭ قازا روزىسىنى تۇتىدۇ، شۇنىڭ بىلەن بىرگە، ئەگەر تاپالىسا بىر قۇلنى ئازاد قىلىدۇ. ئەگەر ئازاد قىلىدىغان قۇل تاپالمىسا، (شۇ بىر كۈنلۈك قەستەن بۇزغان روزىسىنىڭ كاففارىتى ئۈچۈن، بىر كۈننىڭ قازاسىنى قىلغاندىن سىرت) ئۈزۈلدۈرمەي ئاتمىش كۈن روزا تۇتىدۇ. ئەگەر ئۈزۈلدۈرمەي ئاتمىش كۈن روزا تۇتۇشقا قادىر بولالمىسا، ئۇ ھالدا ئاتمىش مىسكىنگە تائام بېرىدۇ.
ئەسھابۇ رەينىڭ (رەي ئەھلىنىڭ) جىما ياكى يەپ ئىچىش ئارقىلىق رامزان روزىسىنى قەستەن بۇزۇۋەتكەن كىشى ھەققىدە بەرگەن ھۆكمىمۇ يۇقىرىقىدەكتۇر.
قەستەنلىك بىلەن قۇسۇش ئارقىلىق روزىسىنى بۇزۇۋەتكەن كىشى، ۋەياكى شېغىل تاش، ئۈنچە-مەرۋايىت ۋە مۇشۇنىڭغا ئوخشاش نەرسىلەرنى يۇتۇۋېتىش ئارقىلىق روزىسىنى بۇزۇۋەتكەن كىشى شۇ كۈنلۈك روزىسىنى قازاسىنى قىلىدۇ. بۇنداق قىلغۇچىغا كاففارەت يوقتۇر. (يەنى قۇل ئازاد قىلىش، ياكى مىسكىنگە تائام بېرىش قاتارلىق ئىشلارنى قىلمايدۇ.)
ئىمام شافىئىىي رەھىمەھۇللاھ مۇنداق دېگەن: كىشى جىما قىلىش ئارقىلىق ئۆز روزىسىنى بۇزۇۋەتسە، شۇ بۇزۇۋەتكەن كۈننىڭ روزىسىنى قايتا تۇتۇپ قازاسىنى قىلىش بىلەن بىرگە، بۇ قىلمىشى ئۈچۈن رەسۇلۇللاھ سەللەللاھۇ ئەلەيھى ۋەسسەللەم بۇيرۇغاندەك كاففارەت بېرىدۇ. (كاففارەت باشتا نەقىل قىلىنغان، ئىمام سۇفيان سەۋرىنىڭ ئېيتقىنىدەكتۇر.) جىمادىن باشقا ئىش بىلەن روزىسىنى بۇزۇۋەتكەن كىشى شۇ كۈنلۈك روزىسىنى تولۇقلاپ تۇتۇپ قازاسىنى قىلىدۇ. بۇنداق كىشىگە كاففارەت بېرىش كېرەك ئەمەس.
ئىمام ئەھمەدمۇ مۇشۇنداق دېگەن. ئىسھاق ئىبنى راھۇۋەيھ سۇفيان سەۋرىگە ئوخشاش ھۆكۈم بەرگەن. [اختلاف العلماء للمروزي 208] — مۇجتەھىد تورى تەرجىمە قىلىپ تارقاتتى | mujtehid.com