كىچىك بالا كىيىمگە قۇسۇۋەتسە، كىيىم نىجىس بولامدۇ؟ | ئىمام ئابدۇلئەزىز ئىبنى باز پەتىۋاسى
سوئال: ئىئوردانىيەنىڭ ئاممان شەھىرىدىن بىر ئايال تىڭشۇغۇچىمىز مۇنداق سوئال سوراپتۇ: بوۋىقىم سۈت پاراشوكى بىلەن ئوزۇقلىنىدۇ، بىر سائەتنىڭ ئىچىدە بىر نەچچە قېتىم قۇسىدۇ، بەزى چاغلاردا قۇسۇقى كىيىمىمگە يۇقۇپ قالىدۇ. مەن بوۋىقىمنىڭ قۇسۇقى يۇقۇپ قالغان كىيىمىمنى يۇيۇۋەتمەستىن ناماز ئوقۇيمەن. (بوۋىقىم كىيىمىمگە قۇسۇۋەتكەن ئەھۋالدا) يېڭىدىن تاھارەت ئېلىشىم كېرەك بولامدۇ؟ شۇنداقلا قۇسۇق تېگىپ قالغان كىيىمىمنى ئالماشۇتۇرۇۋېتىشىم كېرەك بولامدۇ؟ قۇسۇق يۇقۇپ قالغان كىيىمىمدە ئوقۇغان نامىزىم دۇرۇس بولامدۇ؟
پەتىۋا بەرگۈچى: ئىمام ئابدۇلئەزىز ئىبنى باز رەھىمەھۇللاھ
بوۋىقىڭىز سىز دېگەندەك سۈت پاراشۇكىنى ئىچىپ، قۇسقان بولسا، سىز كىيىمىڭىزگە يۇقۇپ قالغان قۇسۇقنى يۇيۇۋېتىشىڭىز كېرەك بولىدۇ. بەزى ئالىملار، بۇ خىل قۇسۇقنى سۈيدۈكنىڭ ھۆكمىدە دەپ قارايدۇ. شۇڭا، كىيىمىڭىزگە يۇقۇپ قالغان قۇسۇقنىڭ مىقدارى كۆپ بولسا، قۇسۇق يۇقۇپ قالغان كىيىمىڭىزنى يۇيۇسىز. ئەگەر ئازغىنە قۇسۇق بولسا، بۇ ئەپۇ قىلىنىدۇ. ئېھتىيات يۈزىسىدىن قۇسۇق تەگكەن كىيىمنى يۇيۇشىڭىز كېرەك بولىدۇ. لېكىن، بوۋىقىڭىزنىڭ قۇسۇقى كىيىمىڭىزگە تەگسە، تاھارىتىڭىزگە دەخلى قىلمايدۇ، تاھارىتىڭىز سۇنمايدۇ. لېكىن، مەيلى ئەر ياكى ئايال كىشىنىڭ كىيىمىگە قۇسۇق تېگىىپ قالسا، قۇسۇق تېگىپ قالغان جاي يۇيۇلىدۇ. مانا بۇ ئۆلىمالارنىڭ بۇ ھەقتىكى ئىختىلاپىدىن چىقىپ كېتىش ئۈچۈن تۇتۇلىدىغان ئېھتىياتلىق يولدۇر.(1)
ئەللامە سالىھ فەۋزاندىن سۈت ئېمىۋاتقان بوۋاقنىڭ قۇسۇقىنىڭ ھۆكمى سورالغاندا مۇنداق پەتىۋا بەرگەن:
قۇسۇق نىجىس. مەيلى چوڭ ئادەمنىڭ بولسۇن، مەيلى كىچىك بالىنىڭ قۇسۇقى بولسۇن ئوخشاشلا نىجىس. چۈنكى ئۇ ئاشقازاندىن قايتىپ چىققان. قۇسۇق تېگىپ قالغان جاي يۇيۇلىدۇ.(2)
ئىمام ئىبنى ئۇسەيمىن رەھىمەھۇللاھ بۇ ھەقتە مۇنداق پەتىۋا بەرگەن:
قۇسۇق نىجىس ئەمەس. مەيلى چوڭ ئادەمنىڭ بولسۇن، مەيلى كىچىك بالىنىڭ بولسۇن، ئوخشاشلا نىجىس ئەمەس. قۇرئان ۋە سۈننەتتىن قۇسۇقنىڭ نىجىسلىقىغا دەلىل تېپىلمىسا، ئۇ ھالدا قۇسۇقنى نىجىس دېيىشكە بولمايدۇ. شۇنىڭدەك، قۇسۇق تاھارەتنى بۇزمايدۇ.(3)
يۇقىرىدا بۇ ھىجرىي ئەسىرنىڭ ئۈچ مەشھۇر فەقىھىنىڭ قۇسۇق ھەققىدىكى پەتىۋاسىنى نەقىل قىلدۇق. ئىمام ئىبنى باز ئىشارە قىلغىنىدەك، بۇ مەسىلىدە ئۆلىمالار ئىختىلاپلاشقان بولۇپ، بىز ئىمام ئىبنى باز قاتارلىق مۇجتەھىد ئالىملارنىڭ ئېھتىيات يۈزىسىدىن قۇسۇق تەگكەن جاينى يۇيۇش كېرەك، دېگەن ھۆكمىنى تۇتۇشنى تېخىمۇ ئېھتىياتچان يول تۇتقانلىق دەپ بىلدۇق.
— مۇجتەھىد تورى تەرجىمە قىلىپ تارقاتتى | mujtehid.com
نەقىل مەنبەلىرى:
(1) https://binbaz.org.sa/fatwas/14375/حكم-قيء-الطفل