قوشۇمچە ماۋزۇ 1: مەۋلۇت تەبرىكلەشنىڭ ئىسلامدىكى ھۆكمى نېمە؟

قوشۇمچە ماۋزۇ 2: رەسۇلۇللاھنىڭ تۇغۇلغان كۈنىنى تەبرىكلەش دۇرۇسمۇ؟

ئىمام ئىبنى باز رەھىمەھۇللاھ

قۇدرەت بارات تەرجىمىسى

بارلىق ھەمدۇسانا ئاللاھقا خاستۇر! پەيغەمبەر سەللەللاھۇ ئەلەيھى ۋەسەللەمگە، ئۇ زاتنىڭ ئائىلە-تاۋابىئاتلىرىغا، ساھابىلىرىگە ۋە ئۇ زاتنىڭ ھىدايەت يولىغا ئەگەشكەنلەرگە سالات ۋە سالاملار بولسۇن.

مەقسەتكە كەلسەك،  نۇرغۇن كىشىلەردىن پەيغەمبەر سەللەللاھۇ ئەلەيھى ۋەسەللەمنىڭ تۇغۇلغان كۈنىنى تەبرىكلەش (يەنى مەۋلۇد تەبرىكلەش، مەۋلۇد پائالىيىتى ئۆتكۈزۈش) ھەققىدە، مەۋلۇد پائالىيىتى جەرياندا ئۇ زات ئۈچۈن ئورنىدىن تۇرۇش، ئۇنىڭغا سالام يوللاش ھەققىدە ۋە مەۋلۇت پائالىيەتلىرىدە قىلىنىدىغان باشقا ئىشلارنىڭ ھۆكمى توغرىسىدا سوئاللار تەكرار سورالدى. بۇ ھەقتىكى سوئاللارغا جاۋابىمىز تۆۋەندىكىدەك:

پەيغەمبەر سەللەللاھۇ ئەلەيھى ۋەسەللەمنىڭ ۋە باشقىلارنىڭ تۇغۇلغان كۈنىنى (مەۋلۇتىنى) تەبرىكلەش جائىز ئەمەس. چۈنكى، رەسۇلۇللاھنىڭ تۇغۇلغان كۈنىنى تەبرىكلەش (يەنى مەۋلۇت تەبرىكلەش) دىندا يېڭىدىن پەيدا قىلىنغان بىدئەتلەردىن بىرىدۇر. بۇنىڭ بىدئەتلىكىنىڭ سەۋەبى، پەيغەمبەر سەللەللاھۇ ئەلەيھى ۋەسەللەم، توغرا يولدىكى خەلىپىلەر، باشقا ساھابىلەر ۋە پەزىلەتلىك ئەسىرلەردە ئۇلارغا ياخشىلىق بىلەن ئەگەشكەن تابىئىنلار قاتارلىقلاردىن ھېچقايسى بىرى رەسۇلۇللاھنىڭ تۇغۇلغان كۈنىنى تەبرىكلىمىگەن. ھالبۇكى ئۇلار سۈننەتنى ئەڭ ياخشى بىلىدىغان، پەيغەمبەر سەللەللاھۇ ئەلەيھى ۋەسەللەمنى ھەممىدىن بەك ياخشى كۆرىدىغان ۋە ئۇنىڭ شەرىئىتىگە ئۆزلىرىدىن كېيىنكىلەرگە قارىغاندا ئەڭ ياخشى ئەگىشىدىغان كىشىلەردۇر. پەيغەمبەر سەللەللاھۇ ئەلەيھى ۋەسەللەمدىن مۇنداق دېگەن: ((من أحدث في أمرنا هذا ما ليس منه فهو رد)) «كىمكى بىزنىڭ بۇ ئىشىمىزدا (يەنى دىنىمىزدا) ئۇنىڭدا بولمىغان بىرەر نەرسىنى يېڭىدىن پەيدا قىلىدىكەن، پەيدا قىلغان ئۇ ئىش رەت قىلىنىدۇ.»

پەيغەمبەر سەللەللاھۇ ئەلەيھى ۋەسەللەم مۇنداق دېگەن: ((عليكم بسنتي وسنة الخلفاء الراشدين المهديين من بعدي، تمسكوا بها وعضوا عليها بالنواجذ وإياكم ومحدثات الأمور، فإن كل محدثة بدعة وكل بدعة ضلالة)) «مېنىڭ سۈننىتىمگە ۋە مەندىن كېيىنكى توغرا يول تۇتقۇچى، ھىدايەت تاپقۇچى خەلىپىلەرنىڭ سۈننىتىگە مەھكەم ئېسىلىڭلار. ئۇنىڭغا ئېزىق چىشلىرىڭلار بىلەن چىشلەپ تۇرۇپ مەھكەم يېپىشىڭلار. دىندا يېڭىدىن پەيدا قىلىنغان ئىشلاردىن ھەزەر قىلىڭلار، چۈنكى دىندا يېڭىدىن پەيدا قىلىنغان ھەر بىر ئىش بىدئەتتۇر، ھەر بىر بىدئەت ئازغۇنلۇقتۇر.»

بۇ ئىككى ھەدىستە بىدئەتلەرنى پەيدا قىلىشتىن ۋە ئۇنىڭغا ئەگىشىشتىن قاتتىق ئاگاھلاندۇرۇش بار. ئاللاھ سۇبھانەھۇ ۋەتەئالا ئۆزىنىڭ ئوچۇق-رۇشەن كىتابىدا مۇنداق دېگەن: {وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا} {پەيغەمبەر سىلەرگە بەرگەننى ئېلىڭلار، ئۇ چەكلىگەن نەرسىدىن يېنىڭلار} [ھەشىر سۈرىسى 7-ئايەت].

ئاللاھ ئەززە ۋە جەللە يەنە مۇنداق دېگەن: {فَلْيَحْذَرِ الَّذِينَ يُخَالِفُونَ عَنْ أَمْرِهِ أَنْ تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ} {پەيغەمبەرنىڭ ئەمرىگە خىلاپلىق قىلغۇچىلار ئۆزلىرىگە بىرەر بالا نازىل بولۇشىدىن، ياكى قاتتىق ئازابقا دۇچار بولۇشىدىن ھەزەر قىلسۇن.} [نۇر سۈرىسى 63-ئايەت]. ئاللاھ سۇبھانەھۇ يەنە مۇنداق دېگەن: {لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا} {ئاللاھنى، ئاخىرەت كۈنىنى (يەنى ئاللاھنىڭ ساۋابىنى ۋە ئاخىرەت كۈنىدىكى بەخت-سائادەتنى) ئۈمىد قىلىدىغان ۋە ئاللاھنى كۆپ ياد ئېتىدىغان كىشىلەر ئۈچۈن، رەسۇلۇللاھتا ھەقىقەتەن ياخشى ئۈلگە بار.} [ئەھزاب سۈرىسى 21-ئايەت].

ئاللاھ تائالا يەنە مۇنداق دېگەن: {وَالسَّابِقُونَ الْأَوَّلُونَ مِنَ الْمُهَاجِرِينَ وَالْأَنْصَارِ وَالَّذِينَ اتَّبَعُوهُمْ بِإِحْسَانٍ رَضِيَ اللَّهُ عَنْهُمْ وَرَضُوا عَنْهُ وَأَعَدَّ لَهُمْ جَنَّاتٍ تَجْرِي تَحْتَهَا الْأَنْهَارُ خَالِدِينَ فِيهَا أَبَدًا ذَلِكَ الْفَوْزُ الْعَظِيمُ} {(ئاللاھقا ئىمان كەلتۈرۈشتە ۋە رەسۇلۇللاھقا ئەگىشىشتە) ھەممىنىڭ ئالدىدا بولغان مۇھاجىرلار ۋە ئەنسارلاردىن (يەنى مۇھاجىر ۋە ئەنسار ساھابىلەردىن) ۋە ئۇلارغا ياخشىلىق بىلەن ئەگەشكەنلەردىن ئاللاھ رازى بولدى، ئۇلارمۇ ئاللاھتىن رازى بولدى. ئاللاھ ئۇلارغا ئاستىدىن ئۆستەڭلەر ئېقىپ تۇرىدىغان جەننەتلەرنى تەييارلىدى، ئۇلار جەننەتتە مەڭگۈ قالىدۇ، بۇ زور مۇۋەپپەقىيەتتۇر} [تەۋبە سۈرىسى 100-ئايەت].

ئاللاھ تائالا يەنە مۇنداق دېگەن: {الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا} {بۈگۈن سىلەرنىڭ دىنىڭلارنى پۈتۈن قىلدىم، سىلەرگە نېمىتىمنى تاماملىدىم، ئىسلام دىنىنى سىلەرنىڭ دىنىڭلار بولۇشقا تاللىدىم.} [مائىدە سۈرىسى 3-ئايەت].

بۇ مەنىدىكى ئايەتلەر ناھايىتى كۆپ. مەۋلۇت ۋە باشقا بىدئەتلەرنى پەيدا قىلىشتىن « ئاللاھ سۇبھانەھۇ بۇ ئۈممەت ئۈچۈن دىننى مۇكەممەل قىلىپ بەرمىگەن، رەسۇلۇللاھ ئەلەيھىسسالام ئۈممەت ئەمەل قىلىشقا تېگىشلىك بولغان نەرسىلەرنى تولۇق يەتكۈزمىگەن» دېگەن مەنە چىقىپ قالىدۇ. مەۋلۇت قاتارلىق بىدئەتلەرنى پەيدا قىلغۇچىلار ئاللاھنىڭ شەرىئىتىدە ئاللاھ ئىزىن بەرمىگەن ئىشلارنى پەيدا قىلغان ھېسابلىنىدۇ، ئاقىۋەتتە «مۇشۇ ئارقىلىق ئاللاھقا يېقىنلىشىمىز» دەپ دەۋا قىلغان، بولۇپ قالىدۇ. شەك-شۈبھىسىزكى، بۇنىڭدا ناھايىتى چوڭ خەتەر بار بولۇپ، مەۋلۇت تەبرىكلەش — ئاللاھ سۇبھانەھۇ ۋەتائالاغا ۋە ئۇنىڭ پەيغەمبىرى سەللەللاھۇ ئەلەيھى ۋەسەللەمگە قىلىنغان ئاسىيلىقتۇر.

ئاللاھ سۇبھانەھۇ ۋەتائالا ئۆز بەندىلىرى ئۈچۈن دىننى مۇكەممەل قىلغان ۋە ئۇلارغا نېمىتىنى تاماملىغان. رەسۇلۇللاھ سەللەللاھۇ ئەلەيھى ۋەسەللەم ھەق دىننى ئىنسانىيەتكە ئوچۇق رەۋىشتە تولۇق يەتكۈزگەن، جەننەتكە ئېلىپ بارىدىغان، دوزاختىن يىراق قىلىدىغان ھېچبىر يولنىڭ بىرىنىمۇ قالدۇرۇپ قويماي، ئۈممەتكە تولۇق بايان قىلىپ بەرگەن.

سەھىھ مۇسلىمدا ئابدۇللاھ ئىبنى ئەمر رەزىيەللاھۇ ئەنھۇدىن رىۋايەت قىلىنغان سەھىھ ھەدىستە كەلگىنىدەك، رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: ((ما بعث الله من نبي إلا كان حقًا عليه أن يدل أمته على خير ما يعلمه لهم، وينذرهم شر ما يعلمه لهم)) «ئاللاھ ئەۋەتكەن ھەرقانداق بىر پەيغەمبەرنىڭ ئۆز ئۈممىتىنى ئۇلار ئۈچۈن ياخشى دەپ بىلگەن نەرسىگە يېتەكلىشى ۋە ئۇلار ئۈچۈن يامان دەپ بىلگەن نەرسىسىدىن ئاگاھلاندۇرۇشى ئۇنىڭ زىممىسىدىكى مەجبۇرىيەتتۇر.» (مۇسلىم)

مەلۇمكى، بىزنىڭ پەيغەمبىرىمىز سەللەللاھۇ ئەلەيھى ۋەسەللەم پەيغەمبەرلەرنىڭ ئەڭ ئەۋزىلى ۋە ئەڭ ئاخىرقىسىدۇر. شۇنداقلا ۋەھىينى يەتكۈزۈشتە ۋە نەسىھەت قىلىشتا ئەڭ مۇكەممەل زاتتۇر. ئەگەر مەۋلۇت تەبرىكلەش ئاللاھ سۇبھانەھۇ رازى بولىدىغان ئىش بولغان بولسا، ئەلۋەتتە رەسۇلۇللاھ سەللەللاھۇ ئەلەيھى ۋەسەللەم ئۇنى ئۈممەتكە بايان قىلىپ بەرگەن ياكى ھايات ۋاقتىدا ئۆزى تەبرىكلىگەن، ۋەياكى ساھابىلىرى رەزىيەللاھۇ ئەنھۇم تەبرىكلىگەن بولاتتى.

بۇلارنىڭ ھېچقايسىسى يۈز بەرمىگەن ئىكەن، مەۋلۇت تەبرىكلەشنىڭ ئىسلام بىلەن ھېچقانداق ئالاقىسى يوقلۇقى، بەلكى مەۋلۇت تەبرىكلەشنىڭ — رەسۇلۇللاھ سەللەللاھۇ ئەلەيھى ۋەسەللەم ئۆز ئۈممىتىنى ئاگاھلاندۇرغان يېڭىدىن پەيدا قىلىنغان ئىشلاردىن ئىكەنلىكى مەلۇم بولىدۇ. يۇقىرىدىكى ئىككى ھەدىستە بۇ زىكىر قىلىنىپ ئۆتتى. بۇ مەنىدە يەنە باشقا ھەدىسلەرمۇ كەلگەن. مەسىلەن، پەيغەمبەر سەللەللاھۇ ئەلەيھى ۋەسەللەمنىڭ (ھەر) جۈمە خۇتبىسىدە: ((فإن خير الحديث كتاب الله وخير الهدي هدي محمد ﷺ، وشر الأمور محدثاتها وكل بدعة ضلالة)) «سۆزلەرنىڭ ئەڭ ياخشىسى ئاللاھنىڭ كىتابىدۇر، يوللارنىڭ ئەڭ ياخشىسى مۇھەممەد سەللەللاھۇ ئەلەيھى ۋەسەللەمنىڭ يولىدۇر. ئىشلارنىڭ ئەڭ يامىنى دىندا يېڭىدىن پەيدا قىلىنغان بىدئەتلەردۇر، ھەرقانداق بىدئەت ئازغۇنلۇقتۇر» دېگەنلىكىگە ئوخشاش. (مۇسلىم)

بۇ جەھەتتىكى ئايەت ۋە ھەدىسلەر ناھايىتى كۆپ. بىر تۈركۈم ئۆلىمالار يۇقىرىدا تىلغا ئېلىنغان ۋە باشقا دەلىللەرگە ئاساسەن مەۋلۇتلارنى ئىنكار قىلىپ ۋە ئۇنىڭدىن ئاگاھلاندۇرۇپ كەسكىن پىكىر بايان قىلغان. كېيىنكى دەۋردىكى بەزى كىشىلەر بۇنىڭغا خىلاپلىق قىلىپ، ئەگەر ئۇنىڭدا رەسۇلۇللاھ سەللەللاھۇ ئەلەيھى ۋەسەللەمگە ھەددىدىن ئېشىش، ئەر-ئاياللار ئارىلىشىپ كېتىش، مۇزىكا ئەسۋابلىرىنى ئىشلىتىش ۋە پاك شەرىئەت ئىنكار قىلىدىغان باشقا مۇنكەر ئىشلار بولمىسا، ئۇنى جائىز دەپ قارىغان ۋە ئۇنى «ياخشى بىدئەت» (بىدئەتى ھەسەنە) دەپ گۇمان قىلغان.

شەرئىي قائىدە شۇكى، كىشىلەر ئىختىلاپ قىلىشقان مەسىلىلەرنى ئاللاھنىڭ كىتابىغا ۋە ئۇنىڭ رەسۇلى مۇھەممەد سەللەللاھۇ ئەلەيھى ۋەسەللەمنىڭ سۈننىتىگە قايتۇرۇش كېرەك. ئاللاھ ئەززە ۋەجەللە مۇنداق دېگەن: {يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُولِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ ذَلِكَ خَيْرٌ وَأَحْسَنُ تَأْوِيلًا} {ئى مۆمىنلەر! ئاللاھقا ئىتائەت قىلىڭلار، پەيغەمبەرگە ئىتائەت قىلىڭلار ۋە ئۆزۈڭلاردىن بولغان ئىش ئىگىلىرىگىمۇ ھەم. ئەگەر بىرەر ئىشتا ئىختىلاپ قىلىشىپ قالساڭلار، ئاللاھقا ۋە ئاخىرەت كۈنىگە ئىشىنىدىغان بولساڭلار، ئۇنى ئاللاھقا ۋە پەيغەمبەرگە قايتۇرۇڭلار. (يەنى ئۇ ئىشقا ھۆكۈم چىقارغۇزۇش ئۈچۈن ئاللاھنىڭ كىتابىغا ۋە پەيغەمبەرنىڭ سۈننىتىگە قايتىڭلار.) بۇنداق قىلىش سىلەر ئۈچۈن خەيرلىكتۇر، نەتىجىسى ئەڭ گۈزەلدۇر.} [نىسا سۈرىسى 59-ئايەت]

ئاللاھ تائالا يەنە مۇنداق دېگەن: {وَمَا اخْتَلَفْتُمْ فِيهِ مِنْ شَيْءٍ فَحُكْمُهُ إِلَى اللَّهِ} {سىلەر ئىختىلاپ قىلىشقان ھەرقانداق ئىشنىڭ ھۆكمى ئاللاھقا مەنسۇپتۇر.} [شۇرا سۈرىسى 10-ئايەت]

بىز مەۋلۇت تەبرىكلەش مەسىلىسىنى ئاللاھ سۇبھانەھۇنىڭ كىتابىغا قايتۇرۇپ كۆردۇق، نەتىجىدە ئاللاھنىڭ كىتابىنىڭ بىزنى رەسۇلۇللاھ سەللەللاھۇ ئەلەيھى ۋەسەللەم ئېلىپ كەلگەن نەرسىلەرگە ئەگىشىشكە بۇيرۇيدىغانلىقىنى، رەسۇلۇللاھ چەكلىگەن نەرسىلەردىن ئاگاھلاندۇرىدىغانلىقىنى، شۇنداقلا ئاللاھ سۇبھانەھۇنىڭ بۇ ئۈممەت ئۈچۈن دىنىنى مۇكەممەل قىلىپ بەرگەنلىكىدىن خەۋەر بېرىدىغانلىقىنى بايقىدۇق. مەۋلۇت تەبرىكلەش پائالىيىتى رەسۇلۇللاھ سەللەللاھۇ ئەلەيھى ۋەسەللەم ئېلىپ كەلگەن ئىشلاردىن ئەمەس، شۇڭا ئۇ ئاللاھ بىز ئۈچۈن مۇكەممەل قىلىپ بەرگەن ۋە رەسۇلۇللاھقا ئەگىشىشكە بۇيرۇغان دىندىن ھېسابلانمايدۇ.

شۇنىڭدەك، بىز مەۋلۇت تەبرىكلەش مەسىلىسىنى رەسۇلۇللاھ سەللەللاھۇ ئەلەيھى ۋەسەللەمنىڭ سۈننىتىگە قايتۇرۇپ كۆردۇق، ئۇنىڭدا پەيغەمبەر ئەلەيھىسسالامنىڭ بۇنى قىلغانلىقىنىمۇ، ئۇنىڭغا بۇيرۇغانلىقىنىمۇ، ساھابىلىرى رەزىيەللاھۇ ئەنھۇمنىڭ ئۇنى قىلغانلىقىنىمۇ تاپالمىدۇق. شۇنىڭ بىلەن بىز مەۋلۇت تەبرىكلەشنىڭ دىن جۈملىسىدىن ئەمەسلىكىنى، بەلكى يېڭىدىن پەيدا قىلىنغان بىدئەتلەردىن ئىكەنلىكىنى، شۇنداقلا ئۇنىڭ ئەھلى كىتاب بولغان يەھۇدىي ۋە ناسارالارنىڭ بايراملىرىغا ئوخشىۋېلىشقا ئېلىپ بارىدىغانلىقىنى كۆردۇق.

يۇقىرىقى بايانلار ئازراقلا بەسىيرىتى بار، ھەقنى خالايدىغان ۋە ھەقنى ئىزدەشتە قىلىشتا ئىنساپلىق بولغان ھەر بىر كىشىگە ئېنىق بولىدۇكى، مەۋلۇت تەبرىكلەش — ئىسلام دىنىدىن ئەمەس، بەلكى ئاللاھ سۇبھانەھۇ ۋەتائالا ۋە ئۇنىڭ رەسۇلى سەللەللاھۇ ئەلەيھى ۋەسەللەم تەرك ئېتىشكە ۋە ھەزەر ئەيلەپ ئۇزاق تۇرۇشقا بۇيرۇغان يېڭىدىن پەيدا قىلىنغان بىدئەتلەردىن بىرىدۇر.

ئەقىللىق كىشىنىڭ ھەرقايسى ئەللەردىكى مەۋلۇت تەبرىكلىگۈچىنىڭ كۆپلۈكىگە ئالدىنىپ قېلىشى دۇرۇس بولمايدۇ. چۈنكى ھەق كۆپلۈك بىلەن تونۇلمايدۇ، بەلكى شەرئىي دەلىللەر بىلەن تونۇلىدۇ. ئاللاھ تائالا يەھۇدى – ناسارالار ھەققىدە مۇنداق دېدى: {وَقَالُوا لَنْ يَدْخُلَ الْجَنَّةَ إِلَّا مَنْ كَانَ هُودًا أَوْ نَصَارَى تِلْكَ أَمَانِيُّهُمْ قُلْ هَاتُوا بُرْهَانَكُمْ إِنْ كُنْتُمْ صَادِقِينَ} {ئۇلار: «يەھۇدى ياكى ناسارا بولمىغان ئادەم ھەرگىز جەننەتكە كىرەلمەيدۇ» دېيىشتى. (يەنى «يەھۇدىلار — «يەھۇدى بولمىغان ئادەم جەننەتكە كىرەلمەيدۇ» دەۋېلىشتى. ناسارالار بولسا «ناسارا بولمىغان ئادەم جەننەتكە كىرەلمەيدۇ» دەۋېتلىشتى.) بۇ ئۇلارنىڭ قۇرۇق ئارزۇسىدۇر. ئېيتقىنكى: «ئەگەر سۆزۈڭلاردا راستچىل بولساڭلار، دەلىلىڭلارنى كەلتۈرۈڭلار»} [بەقەرە سۈرىسى 111-ئايەت] (شەيخ بۇ ئايەتنى دەلىل قىلىش ئارقىلى، ھەقىقەت — ئېغىزدىكى داۋا ئارقىلىق ئىسپاتلانمايدۇ، ئاللاھ ۋە رەسۇلى ئېلىپ كەلگەن قەتئىي دەلىل بىلەن بولىدۇ، مەۋلۇت تەبرىكلىگۈچىلەر بۇ قىلمىشىنىڭ ئاللاھنىڭ دىنىدا بار ئىكەنلىكىنى ئىسپاتلاش ئۈچۈن قۇرئان-سۈننەتتىن ئېنىق دەلىل ئېلىپ كېلىشى كېرەك، دېمەكچى.)

ئاللاھ سۇبھانەھۇ ۋەتائالا يەنە مۇنداق دېگەن: {وَإِنْ تُطِعْ أَكْثَرَ مَنْ فِي الْأَرْضِ يُضِلُّوكَ عَنْ سَبِيلِ اللَّهِ} {ئەگەر يەر يۈزىدىكى كىشىلەرنىڭ كۆپچىلىكىگە ئىتائەت قىلساڭ، ئۇلار سېنى ئاللاھنىڭ يولىدىن ئازدۇرىدۇ.} [ئەنئام سۈرىسى 116-ئايەت].

ئۇنىڭ ئۈستىگە، مەۋلۇت تەبرىكلەش پائالىيەتلىرىنىڭ كۆپىنچىسى — ئۇنىڭ بىدئەت بولۇشىغا قوشۇلۇپ — ئەر-ئاياللار ئارىلىشىپ كېتىش، مەۋلۇت پائالىيىتى جەريانىدا ناخشا-مۇزىكىلارنى ياڭرىتىش، مەست قىلغۇچى ۋە زەھەرلىك چېكىملىكلەرنى ئىستىمال قىلىش ۋە باشقا نۇرغۇنلىغان يامان – مۇنكەر ئىشلارنى ئۆز ئىچىگە ئېلىشتىن خالىي بولالمايدۇ.

ھەتتا مەۋلۇت تەبرىكلەشتە بۇنىڭدىنمۇ چوڭراق بولغان ئىش، يەنى چوڭ شىرك سادىر بولۇپ قېلىشىمۇ مۇمكىن. ئۇ بولسىمۇ، رەسۇلۇللاھ سەللەللاھۇ ئەلەيھى ۋەسەللەمگە ياكى ئەۋلىيالار دەپ ئاتىلىدىغان باشقا كىشىلەرگە نىسبەتەن ھەددىدىن ئېشىش، (ئاللاھقا ئەمەس) ئۇلارغا دۇئا قىلىش ۋە ئۇلاردىن ياردەم-مەدەت تىلەش، ئۇلارنى غەيبنى بىلىدۇ دەپ ئېتىقاد قىلىش قاتارلىق شىرك ئەمەللەر ئوتتۇرىغا چىقىدىغان ئەھۋاللار كەڭرى مەۋجۇت، شۇنداقلا نۇرغۇن كىشىلەر پەيغەمبەر ئەلەيھىسسالامنىڭ ۋە ئۇلار ئەۋلىيالار دەپ ئاتايدىغان كىشىلەرنىڭ تۇغۇلغان كۈنىنى تەبرىكلىگەن ۋاقىتلىرىدا قىلىدىغان يۇقىرىقىدىغان باشقا كۇفرىي قىلمىشلارمۇ ئوتتۇرىغا چىقىشتىن خالىي ئەمەس. رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: ((إياكم والغلو في الدين فإنما أهلك من كان قبلكم الغلو في الدين)) «دىندا ھەددىدىن ئېشىشتىن ساقلىنىڭلار، چۈنكى سىلەردىن بۇرۇنقىلارنى ھالاك قىلغان نەرسە دەل دىندا ھەددىدىن ئېشىشتۇر.» (مەۋلۇت تەبرىكلەش — دىندا ھەددىدىن ئاشقانلىقتۇر.)

پەيغەمبەر سەللەللاھۇ ئەلەيھى ۋەسەللەم يەنە مۇنداق دېگەن: ((لا تطروني كما أطرت النصارى ابن مريم إنما أنا عبد، فقولوا: عبد الله ورسوله)) «مېنى خۇددى ناسارالار مەريەم ئوغلى ئىسانى ھەددىدىن ئاشۇرۇپ ماختىغىنىدەك ماختىماڭلار، مەن پەقەت بىر بەندىمەن، شۇڭا مېنى ‹ئاللاھنىڭ بەندىسى ۋە رەسۇلى› دەڭلار». (بۇ ھەدىسنى ئىمام بۇخارى ئۆزىنىڭ سەھىھ كىتابىدا ئۆمەر رەزىيەللاھۇ ئەنھۇنىڭ ھەدىسىدىن رىۋايەت قىلغان)

ئەڭ ئەجەبلىنەرلىك ۋە غەلىتە ئىشلاردىن بىرى شۇكى، نۇرغۇن كىشىلەر بىدئەت ھېسابلىنىدىغان بۇنداق تەبرىكلەش پائالىيەتلىرىگە ئاكتىپلىق بىلەن قاتنىشىشقا تىرىشىدۇ ۋە ئۇنى (توغرا دەپ) قوغدايدۇ، ئەمما ئاللاھ ئۇلارغا پەرز قىلغان جۈمە ۋە جامائەت نامازلىرىغا قاتنىشىشتىن ئارقىدا قالىدۇ، بۇنىڭغا پەرۋامۇ قىلمايدۇ؛ ھەمدە ئۆزىنى ناھايىتى چوڭ بىر مۇنكەر ئىش قىلدىم دەپمۇ قارىمايدۇ. شەك-شۈبھىسىزكى، بۇ ئىماننىڭ كەمتۈكلۈكىدىن، بەسىيرەتنىڭ ئاجىزلىقىدىن ۋە تۈرلۈك گۇناھ-مەئسىيەتلەر سەۋەبلىك قەلبلىرىنىڭ قاساۋەتلىشىپ كەتكەنلىكىدىن بولىدۇ. ئاللاھتىن بىزگە ۋە بارلىق مۇسۇلمانلارغا ئامانلىق تىلەيمىز.

بەزىلەر رەسۇلۇللاھ سەللەللاھۇ ئەلەيھى ۋەسەللەمنى مەۋلۇتقا ھازىر بولىدۇ دەپ ئويلايدۇ. شۇڭا ئۇلار رەسۇلۇللاھقا سالام بېرىش، قارشى ئېلىش ئۈچۈن ئورنىدىن تۇرۇشىدۇ. بۇ ئەڭ چوڭ باتىل ۋە ئەڭ قەبىھ جاھىللىقتۇر. چۈنكى، رەسۇلۇللاھ سەللەللاھۇ ئەلەيھى ۋەسەللەم قىيامەت كۈنىدىن بۇرۇن قەبرىسىدىن چىقمايدۇ. كىشىلەردىن ھېچكىم بىلەن ئالاقە قىلمايدۇ ۋە ئۇلارنىڭ يىغىلىشلىرىغا ھازىر بولمايدۇ. بەلكى ئۇ قىيامەت كۈنىگىچە قەبرىسىدە تۇرىدۇ. رەسۇلۇللاھنىڭ روھى رەببىنىڭ دەرگاھىداىكى كەرامەت دىيارى بولغان «ئىللىييىن» نىڭ ئەڭ ئالىي مەرتىۋىسىدە بولىدۇ. ئاللاھ تائالا «مۇئمىنۇن» سۈرىسىدە مۇنداق دېگەندەك: {ثُمَّ إِنَّكُمْ بَعْدَ ذَلِكَ لَمَيِّتُونَ * ثُمَّ إِنَّكُمْ يَوْمَ الْقِيَامَةِ تُبْعَثُونَ} {ئاندىن سىلەر چوقۇم ئۆلىسىلەر. * ئاندىن قىيامەت كۈنى چوقۇم تىرىلدۈرۈلىسىلەر.} [مۇئمىنۇن سۈرىسى 15-16-ئايەتلەر]

پەيغەمبەر سەللەللاھۇ ئەلەيھى ۋەسەللەم مۇنداق دېگەن: ((أنا أول من ينشق عنه القبر يوم القيامة وأنا أول شافع وأول مشفع)) «قىيامەت كۈنى قەبرىسى تۇنجى بولۇپ يېرىلىدىغان (يەنى چىقىدىغان) ئادەم مەن، تۇنجى شاپائەت قىلغۇچى ۋە شاپائىتى تۇنجى قوبۇل قىلىنغۇچىمۇ مەن.» ئۇ زاتقا رەببىدىن ئەڭ ئەۋزەل دۇرۇت ۋە سالاملار بولسۇن.

بۇ ئايىتى كەرىمە، ھەدىس شېرىپ ۋە بۇ مەنىدە كەلگەن باشقا ئايەت-ھەدىسلەرنىڭ ھەممىسى پەيغەمبەر سەللەللاھۇ ئەلەيھى ۋەسەللەمنىڭ ۋە باشقا ئۆلۈپ كەتكەنلەرنىڭ پەقەت قىيامەت كۈنىلا قەبرىلىرىدىن چىقىدىغانلىقىغا دالالەت قىلىدۇ. بۇ ئىسلام ئالىملىرى ئارىسىدا بىردەك ئىجما قىلىنغان، ھېچقانداق تالاش-تارتىش بولمىغان ئىشتۇر. شۇڭلاشقا ھەر بىر مۇسۇلمان بۇ ئىشلارغا دىققەت قىلىشى، جاھىللار ۋە شۇلارغا ئوخشايدىغانلار ئاللاھ ھېچقانداق دەلىل چۈشۈرمىگەن يېڭىدىن پەيدا قىلىۋالغان بىدئەت ۋە خۇراپاتلاردىن ھەزەر ئەيلىشى كېرەك. ياردەم سورىلىدىغان زات ئاللاھتۇر، تەۋەككۈل قىلىنىدىغان زاتمۇ يەنىلا ئاللاھتۇر. گۇناھتىن يېنىش ۋە تائەتكە قۇۋۋەت تېپىش پەقەت ئاللاھنىڭ ياردىمى بىلەنلا بولىدۇ.

رەسۇلۇللاھ سەللەللاھۇ ئەلەيھى ۋەسەللەمگە دۇرۇت ۋە سالام يوللاش — كىشىنى ئاللاھقا يېقىنلاشتۇرىدىغان ئەڭ ئەۋزەل ئىبادەتلەردىن ۋە ياخشى ئەمەللەردىندۇر. ئاللاھ تائالا مۇنداق دېگەندەك: {إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} {ئاللاھ پەيغەمبەرگە رەھمەت قىلىدۇ، پەرىشتىلەرمۇ پەيغەمبەرگە مەغپىرەت تەلەپ قىلىدۇ. ئى مۆمىنلەر! سىلەر پەيغەمبەرگە دۇرۇت ئېيتىڭلار ۋە ئامانلىق تىلەپ سالام يوللاڭلار.} [ئەھزاب سۈرىسى 56-ئايەت] پەيغەمبەر سەللەللاھۇ ئەلەيھى ۋەسەللەم مۇنداق دېگەن: «كىمكى ماڭا بىر قېتىم دۇرۇت ئېيتىدىكەن، ئاللاھ ئۇنىڭغا ئون قېتىم رەھمەت قىلىدۇ.» سالات ئېيتىش ھەممە ۋاقىتلاردا شەرىئەتتە كۆرسىتىلگەن بولۇپ، ھەر بىر نامازنىڭ ئاخىرىدا (يەنى ناماز ئىچىدىكى ئاخىرقى تەشەھھۇدتا) سالات ئېيتىش تەكىتلەنگەن، بىر تۈركۈم ئالىملارنىڭ نەزەرىدە ھەر بىر نامازنىڭ ئاخىرقى تەشەھھۇدىدا (ئەتتەھىيياتتا) سالات ئوقۇش (يەنى سەللى، بارىك دۇئاسىنى) ئوقۇش ۋاجىپتۇر. نۇرغۇنلىغان سەھىھ ھەدىسلەر دالالەت قىلغىنىدەك، نۇرغۇن ئورۇنلاردا، جۈملىدىن ئەزاندىن كېيىن، پەيغەمبەر ئەلەيھىسسالامنىڭ ئىسمى تىلغا ئېلىنغاندا، جۈمە كۈنى ۋە جۈمە كېچىسىدە دۇرۇت ئېيتىش تەكىتلەنگەن سۈننەتتۇر.

ئاللاھتىن بىزنى ۋە بارلىق مۇسۇلمانلارنى ئۆز دىنىنى چۈشىنىشكە، ئۇنىڭدا مۇستەھكەم تۇرۇشقا مۇۋەپپەق قىلىشىنى، ھەممەيلەنگە سۈننەتكە مەھكەم ئېسىلىشنى، بىدئەتتىن ھەزەر قىلىشنى نېمەت قىلىپ بېرىشىنى سورايمىز. ئاللاھ بەكمۇ سېخىيدۇر، بەكمۇ كەرەملىكتۇر. ئاللاھنىڭ سالات ۋە سالامى بىزنىڭ نەبيمىزگە، ئۇ زاتنىڭ ئائىلە-تاۋابىئاتلىرىغا ۋە ساھابىلىرىگە بولسۇن. (ئىمام ئىبنى بازنىڭ مەۋلۇت تەبرىكلەشنىڭ ھۆكمى ھەققىدىكى جاۋابى مۇشۇ يەردە تۈگىدى، قۇدرەت بارات تەرجىمە قىلدى.)

مەنبە:

https://binbaz.org.sa/fatwas/20/في-حكم-الاحتفال-بالموالد-النبوية-وغيرها

The post مەۋلۇت تەبرىكلەش — ئاللاھقا ۋە رەسۇلىغا قىلىنغان بۈيۈك ئاسىيلىقتۇر first appeared on مۇجتەھىد پەتىۋا تورى.

The post مەۋلۇت تەبرىكلەش — ئاللاھقا ۋە رەسۇلىغا قىلىنغان بۈيۈك ئاسىيلىقتۇر appeared first on مۇجتەھىد پەتىۋا تورى.

ئىمام ئابدۇلئەزىز ئىبنى باز رەھىمەھۇللاھ بىر خۇتبىسىدە مۇنداق دېگەن:

مەن سىلەرگە يۇقىرىدا ئۆتكەنلەردىن باشقا، كىشىلەر يېڭىدىن پەيدا قىلغان ۋە پەيغەمبەر ئەلەيھىسسالام ئېلىپ كەلگەن شەرىئەتتىن چىقىپ كەتكەن بىر قىسىم ئىشلارنىمۇ بايان قىلىپ بېرەي.

كىشىلەر دىندا يېڭىدىن پەيدا قىلغان ۋە ئاللاھ ئۇنىڭغا ھېچقانداق دەلىل چۈشۈرمىگەن سوپىلىق تەرىقەتلىرىدۇر. مەسىلەن: رىفائىييە، نەقشىبەندىييە، تىجانىييە، مەرامىييە ۋە شۇنىڭغا ئوخشاشلىرى ئىسلام شەرىئىتىدىن چىقىپ كەتكەن قانۇنسىز يوللاردۇر.

سوپىلار پەيدا قىلغان بۇ تەرىقەتلەرنىڭ ھەممىسى ئەمەلىيەتتە شەيتانىي يوللاردۇر، قەبىھ بىدئەتلەردۇر. مۇسۇلمانلارنىڭ بۇ تەرىقەتلەرنىڭ ھەر قايسى بىر بىلەن شۇغۇللىنىشىغا، بۇ يولدا مېڭىشىغا ۋە ئۇنىڭغا ئەمەل قىلىشىغا بولمايدۇ. ئەكسىچە، ئۇلارغا قارشى تۇرۇش ۋە ئۇلاردىن ئاگاھلاندۇرۇش ۋاجىپتۇر. چۈنكى ئاللاھ جەللە ۋەئەلا بىزگە ھېچكىمنىڭ تولۇقلىشىغا ئەسلا موھتاج بولمايدىغان، توغرا ۋە مۇكەممەل بىر دىننى شەرىئەت قىلىپ بەردى. ئاللاھقا ھەمدىلەر بولسۇنكى، بۇ دىن ئۆزىنىڭ شەرىئىتى، ھۆكۈملىرى، ئاساسلىرى ۋە تارماقلىرى بىلەن تولۇق ۋە مۇكەممەلدۇر.

خۇددى ئاللاھ جەللە ۋەئەلا ئېيتقاندەك: ﴿شۈبھىسىزكى، بۇ مېنىڭ توغرا يولۇمدۇر، ئۇنىڭغا ئەگىشىڭلار، (باشقا) يوللارغا ئەگەشمەڭلار، ئۇلار سىلەرنى ئاللاھنىڭ يولىدىن ئايرىۋېتىدۇ﴾ (سۈرە ئەنئام 153-ئايەت).

(ئايەتتىكى) بۇ «يوللار» بولسا بىدئەتلەر ۋە شەھۋەتلەردۇر. ئاللاھنىڭ يولى ۋە ئاللاھ بەندىلىرىگە شەرىئەت قىلىپ بەرگەن دىن بولسا — ئاللاھ جەللە ۋەئەلانى تەۋھىدلەش، ئاللاھقا ئىتائەت قىلىش ۋە ئۇنىڭ پەيغەمبىرى (سەللەللاھۇ ئەلەيھى ۋەسەللەم) بۇيرۇغان ۋە توسقان ئىشلاردا پەيغەمبەرگە ئىتائەت قىلىشتۇر. مانا بۇ ئاللاھنىڭ يولىدۇر، مانا بۇ ئاللاھنىڭ توغرا يولىدۇر، مانا بۇ ئاللاھنىڭ دىنىدۇر.

ئەمما كىشىلەر پەيدا قىلغان، بۇنىڭغا خىلاپ بولغان تەرىقەتلەر، مەيلى ئۇ تىجانىييە، نەقشىبەندىيە، رىفائىييە، قادىرىييە، خەلۋەتىييە ياكى باشقىلار بولسۇن، ئۇلارنىڭ ھەممىسى باتىل يولدۇر، قەبىھ بىدئەتلەردۇر ۋە دىندا يېڭىدىن پەيدا قىلىنغان ئىشلاردۇر. كىشىلەرنى ئۇلاردىن ئاگاھلاندۇرۇش ۋە ئۇلارنى تەرك ئېتىش ۋاجىپتۇر. — مۇجتەھىد تورى تەرجىمە قىلىپ تارقاتتى

مەنبە: https://youtube.com/shorts/R8r5urVgPaM?si=eiQKzX63npRjroRo

مۇناسىۋەتلىك پەتىۋالار:
ئىسلامدا تەسەۋۋۇپنىڭ (سوپىلىقنىڭ) ھۆكمى نېمە؟

سوپىلار قانداق كىشىلەر، ئۇلارنىڭ يولى توغرىمۇ؟

ماختىلىدىغان تەسەۋۋۇپ بارمۇ؟ | ئەللامە سالىھ ئەلفەۋزان پەتىۋاسى

ئاشقۇن سوپىلار ئۆزىنى ئىلاھ دەپ قارامدۇ؟ | ئەللامە ئىبنى ئۇسەيمىن پەتىۋاسى

ئوپچە زىكىر قىلىش سوپىلار ئوتتۇرىغا چىقارغان بىدئەتتۇر | ئىمام ئىبنى ئۇسەيمىن

تەسەۋۋۇپچىلارنىڭ (سوپىلارنىڭ) مەسجىدىدە ناماز ئوقۇشنىڭ ھۆكمى؟

The post تەسەۋۋۇپ تەرىقەتلىرى توغرا يولمۇ؟ first appeared on مۇجتەھىد پەتىۋا تورى.

The post تەسەۋۋۇپ تەرىقەتلىرى توغرا يولمۇ؟ appeared first on مۇجتەھىد پەتىۋا تورى.

مۇجتەھىد تورى تەرجىمە قىلىپ تارقاتتى

ئىمام ئىبنى باز رەھىمەھۇللاھ باشچىلىقىدىكى ھەرەم ئالىملىرى پەتىۋا ئورگىنىدىن مۇنداق پەتىۋا سورالدى:

سوئال: رەسۇلۇللاھ سەللەللاھۇ ئەلەيھى ۋەسەللەم ئۆزىنىڭ مۇبارەك قەبرىسى يېنىدا قىلىنغان ھەر بىر دۇئا ۋە نىدانى، ياكى ئۆزىگە ئوقۇلغان سالاۋاتلارنى ئاڭلامدۇ؟ چۈنكى ھەدىستە: «كىم قەبرەم يېنىدا ماڭا سالاۋات ئېيتسا، مەن ئۇنى ئاڭلايمەن» دەپ كەلگەن. بۇ ھەدىس سەھىھمۇ، زەئىپمۇ ياكى رەسۇلۇللاھ سەللەللاھۇ ئەلەيھى ۋەسەللەمگە نىسبەت بېرىلگەن توقۇلمىمۇ؟

جاۋاب: بۇ مەسىلىدىكى ئاساسلىق قائىدە شۇكى، ئۆلۈكلەر ئومۇمەن تىرىك ئىنسانلارنىڭ نىدالىرىنىمۇ، دۇئالىرىنىمۇ ئاڭلىمايدۇ. ئاللاھ تائالا مۇنداق دەيدۇ: «سەن قەبرىلەردىكى (ئۆلۈكلەرگە) ئاڭلىتالمايسەن.» (سۈرە فاتىر، 22 – ئايەت). 

قۇرئان ۋە سەھىھ سۈننەتتە رەسۇلۇللاھ سەللەللاھۇ ئەلەيھى ۋەسەللەمنىڭ بىرەر ئىنساننىڭ دۇئاسىنى ۋە نىداسىنى ئاڭلايدىغانلىقىغا دەلىل بولىدىغان، ھەمدە بۇنى رەسۇلۇللاھقا خاس بىر خۇسۇسىيەت قىلىدىغان ھېچقانداق نەس (دەلىل) يوق. ئەمما سالاۋات ۋە سالام يوللىغۇچىنىڭ سالاۋات – سالاملىرىنىڭ ئۇ زاتقا يەتكۈزۈلىدىغانلىقى ئېنىقتۇر. سالاۋات ئېيتقۇچىنىڭ قەبرە يېنىدا بولۇشى ياكى يىراقتا بولۇشى ئوتتۇرىسىدا ھېچقانداق پەرىق يوق. ئەلى ئىبنى ھۈسەين ئىبنى ئەلى رەزىيەللاھۇ ئەنھۇدىن سابىت بولغان بىر ئەسەردە بايان قىلىنىشىچە، ئۇ رەسۇلۇللاھ سەللەللاھۇ ئەلەيھى ۋەسەللەمنىڭ قەبرىسى يېنىدىكى بىر يوچۇققا كىرىپ دۇئا قىلىۋاتقان بىر ئادەمنى كۆرگەن ۋە دەرھال ئۇنى توسۇپ مۇنداق دېگەن: «سىلەرگە دادامدىن، ئۇ بوۋامدىن، بوۋام رەسۇلۇللاھ سەللەللاھۇ ئەلەيھى ۋەسەللەمدىن ئاڭلىغان بىر ھەدىسنى سۆزلەپ بېرەيمۇ؟ رەسۇلۇللاھ مۇنداق دېگەن: ‹مېنىڭ قەبرەمنى ھېيت ئورنىغا، ئۆيلىرىڭلارنى قەبرىستانلىققا ئايلاندۇرۇۋالماڭلار. ماڭا سالاۋات ئېيتىڭلار، چۈنكى سىلەر قەيەردە بولۇڭلار، سالاۋاتىڭلار ماڭا يەتكۈزۈلىدۇ.›» (ئىمام ئەھمەد رىۋايىتى).

«كىم قەبرەم يېنىدا ماڭا سالاۋات ئېيتسا مەن ئۇنى ئاڭلايمەن، كىم يىراقتا تۇرۇپ سالاۋات ئېيتسا ئۇ ماڭا يەتكۈزۈلىدۇ» دېگەن ھەدىسكە كەلسەك، بۇ ھەدىس ئىلىم ئەھلىلىرى نەزىرىدە زەئىپ ھەدىستۇر. ئىمام ئىبنى تەيمىييە مۇنداق دېگەن: «بۇ ھەدىس، ھەدىس ئەھلىنىڭ ئىتتىپاقى بىلەن ئەئمەشنىڭ نامىدىن توقۇلغان بىر رىۋايەتتۇر.» (مەجمۇئۇل فەتاۋا 27\241) ئەبۇ داۋۇد ئەبۇ ھۇرەيرە رەزىيەللاھۇ ئەنھۇدىن ھەسەن سەنەد بىلەن رىۋايەت قىلغان ھەدىستە رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «ماڭا سالام بەرگەن ھەر بىر مۇسۇلماننىڭ سالامىغا جاۋاب بېرىشىم ئۈچۈن، ئاللاھ مېنىڭ روھىمنى قايتۇرىدۇ.» (ئىمام ئەھمەد، ئەبۇ داۋۇد) بۇ ھەدىستىمۇ رەسۇلۇللاھ سەللەللاھۇ ئەلەيھى ۋەسەللەمنىڭ مۇسۇلمانلارنىڭ سالاۋات – سالاملىرىنى (بىۋاسىتە) ئاڭلايدىغانلىقىغا ئائىت ئېنىق (سەرىھ) بىر ئىپادە يوق. بەلكى پەرىشتىلەر سالاۋات – سالامنى ئۇ زاتقا يەتكۈزگەندە، ئۇنىڭغا جاۋاب قايتۇرۇشى ئېھتىمالغا يېقىن. مۇسۇلمانلارنىڭ سالامىنى ئاڭلايدۇ دەپ پەرەز قىلغان تەقدىردىمۇ، بۇ ئەھۋال ئۇنىڭ دۇئا ۋە نىدالارنىمۇ ئاڭلايدىغانلىقىدىن دېرەك بەرمەيدۇ.

پەتىۋا بەرگۈچى ئالىملار: ئابدۇلئەزىز ئىبنى باز، ئابدۇللاھ ئىبنى قۇئۇد، ئابدۇللاھ ئىبنى غۇدەييان، ئابدۇررەززاق ئەفىيفىي [فەتاۋا لەجنەتۇد دائىمە، 1/2/472]

The post رەسۇلۇللاھ ئەلەيھى ۋەسەللەم قەبرىسىدە ئۆزىگە نىدا قىلغانلارنى ئاڭلامدۇ؟ | ھەرەم پەتىۋا ئورگىنى first appeared on مۇجتەھىد پەتىۋا تورى.

The post رەسۇلۇللاھ ئەلەيھى ۋەسەللەم قەبرىسىدە ئۆزىگە نىدا قىلغانلارنى ئاڭلامدۇ؟ | ھەرەم پەتىۋا ئورگىنى appeared first on مۇجتەھىد پەتىۋا تورى.

پەتىۋا بەرگۈچى: ئىمام ئابدۇلئەزىز ئىبنى باز

سوئال: مەن ئاللاھقا شۈكرى بىر مۇسۇلمان قىزمەن، ئاللاھنى رازى قىلىدىغان بارلىق ئىشلارنى قىلىشقا تىرىشىمەن ۋە شەرئىي ھىجاپقا تولۇق ئەمەل قىلىمەن. لېكىن ئانام (ئاللاھ ئۇنى كەچۈرسۇن) مېنىڭ ھىجاپلىنىشىمنى خالىمايدۇ، مېنى كىنو-ۋىدىئولارنى كۆرۈشكە بۇيرۇيدۇ. ئۇ ماڭا: «ئەگەر ھاياتنىڭ لەززىتىنى سۈرۈپ كۆڭلۈڭنى ئاچمىساڭ، موماي بولۇپ قېرىپ كېتىسەن، چېچىڭ ئاقىرىپ كېتىدۇ» دەيدۇ. بۇ جەھەتتە كۆرسەتمە بېرىشلىرىگە ئېھتىياجىم بار؟

جاۋاب: سىزگە ۋاجىپ بولغىنى ئانىڭىزغا مۇلايىملىق بىلەن مۇئامىلە قىلىش، ئۇنىڭغا ياخشىلىق قىلىش ۋە ئەڭ گۈزەل سۆزلەر بىلەن خىتاب قىلىشتۇر. چۈنكى ئانىنىڭ پەرزەنت ئۈستىدىكى ھەققى ئىنتايىن چوڭ. لېكىن، شەرىئەتكە ئۇيغۇر بولمىغان ئىشلاردا ئۇنىڭغا ئىتائەت قىلىشىڭغا بولمايدۇ. ھىجاپ ئاللاھ بەلگىلىگەن پەرز. ئاتا – ئانا بولغۇچىنىڭ قىز پەرزەنتىنى ھىجاپتىن چەكلەش ھوقۇقى يوق. ئەگەر ئاتا – ئانا پەرزەنتىنى ھىجاپتىن چەكلىسە، ئۇنىڭغا ئىتائەت قىلىنمايدۇ. چۈنكى ئەلىي رەزىيەللاھۇ ئەنھۇ ھەدىس سۆزلەپ، رەسۇلۇللاھ سەللەللاھۇ ئەلەيھى ۋەسەللەمنىڭ مۇنداق دېگەنلىكىنى بايان قىلغان: ((لاَ طَاعَةَ فِي مَعْصِيَةٍ، إِنَّمَا الطَّاعَةُ فِي الْمَعْرُوفِ)) «يامان، گۇناھلىق ئىشلارغا (بۇيرۇلغان كىشى بۇيرۇغۇچىغا) ئىتائەت قىلىشقا بولمايدۇ. ئىتائەت پەقەت ياخشى ئىشلاردا بولىدۇ.» (بۇخارى 7275، مۇسلىم 1840)

رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: ((لا طاعة لمخلوق في معصية الخالق)) «ياراتقۇچىغا (ئاللاھقا) ئاسىيلىق قىلىنىش بەدىلىگە يارىتىلغۇچىغا ئىتائەت قىلىشقا بولمايدۇ.» (مۇسەننەف ئىبنى ئەبى شەيبە؛ بۇ مەنىدىكى ھەدىسنى يەنە ئىمام ئەھمەد، ئەبۇ داۋۇد، تىرمىزى قاتارلىقلار نەقىل قىلغان)

دادىنىڭ، ئەرنىڭ ۋە باشقىلارنىڭ ھۆكمىمۇ شۇنىڭغا ئوخشاشتۇر. يۇقىرىقى ھەدىسلەرگە ئاساسەن، ئاللاھقا ئاسىيلىق قىلىنىدىغان ئىشلاردا ئۇلارغا ئىتائەت قىلىنمايدۇ.

لېكىن، ئايال كىشى مەسىلىلەرنى ھەل قىلىشتا مۇلايىملىق ۋە گۈزەل ئۇسلۇبنى قوللىنىشى كېرەك. يەنى شەرئىي دەلىللەرنى بايان قىلىش، ئاللاھ ۋە رەسۇلىغا ئىتائەت قىلىشنىڭ ۋاجىپلىقىنى چۈشەندۈرۈش ۋە ئاللاھقا ئاسىيلىق قىلىشتىن ئاگاھلاندۇرۇش بىلەن بىرگە، ھەق مەيداندا چىڭ تۇرۇشى، ئېرى، دادىسى، ئانىسى ياكى باشقىلار شەرىئەتكە خىلاپ ئىشقا بۇيرۇسا، ئۇلارغا ئىتائەت قىلماسلىقى لازىم.

تېلۋزۇر ۋە ۋىدىئولاردىن كىنولارنى كۆرۈشكە بولمايدۇ، چۈنكى كىنولاردا تۈرلۈك باتىل نەرسىلەر مەۋجۇتتۇر. (شەيخنىڭ پەتىۋاسى تۈگىدى)

بەزى مۇسۇلمان خانىم – قىزلار ئەرلەر چىقىدىغان ۋىديو فىلىملەرنى كۆرۈپ، باشقا يەرلەرگىمۇ تارقىتىپ يۈرۈشىدۇ. بۇ ئاللاھنىڭ بۇيرۇقىغا، يەنى سۈرە نۇرنىڭ 31- ئايىتىگە خىلاپ. شۇنداقلا رەسۇلۇللاھ سەللەللاھۇ ئەلەيھى ۋەسەللەمنىڭ بۇيرۇقىغىمۇ خىلاپ.

ئاللاھ سۇبھانەھۇ ۋەتائالا ئاياللارغا مۇنداق خىتاپ قىلغان: {وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ} {(ئى پەيغەمبەر، مۆمىنە ئاياللارغا ئېيتقىنكى،) كۆزلىرىنى (قارىشى ئۇيغۇن بولمىغان ھەر قانداق نەرسىگە قاراشتىن) يىغسۇن.} (سۈرە نۇرنىڭ 31- ئايىتىدىن)

رەسۇلۇللاھ سەللەللاھۇ ئەلەيھى ۋەسسەللەم مۇنداق دېگەن:((اصرف بصرك)) «(نامەھرەمگە قاراشتىن) كۆزۈڭنى تارت.» (سۇيۇتى-جامىئۇس سەغىر 1084؛ سەھىھ ئەبۇ داۋۇد 2148)

مەشھۇر تابىئىن ئالىم سەئىد ئىبنى مۇسەييەب رەھىمەھۇللاھ مۇنداق دېگەن: ھەزىرتى ئەلى رەزىيەللاھۇ  ئەنھۇ (ئۆزىنىڭ ئايالى، رەسۇلۇللاھ سەللەللاھۇ ئەلەيھى ۋەسسەللەمنىڭ قىزى، دۇنيا ئاياللىرىنىڭ ئەڭ ئۈستۈنلىرى جۈملىسىدىن بولغان) فاتىمە رەزىيەللاھۇ ئەنھادىن «ئاياللار ئۈچۈن ئەڭ خەيرلىك ئىش قايسى؟» دەپ سورىغان ئىدى، فاتىمە رەزىيەللاھۇ ئەنھا «ئەرلەرنىڭ ئاياللارنى كۆرمەسلىكى، ئاياللارنىڭمۇ ئەرلەرنى كۆرمەسلىكى ئايال كىشى ئۈچۈن ئەڭ خەيرلىك ئىشتۇر» دېدى. ھەزىرتى ئەلى رەزىيەللاھۇ ئەنھۇ بۇ گەپنى رەسۇلۇللاھ سەللەللاھۇ ئەلەيھى ۋەسسەللەمگە يەتكۈزىۋىدى، رەسۇلۇللاھ «فاتىمە مېنىڭ بىر پارچەمدۇر» دېدى. (ئەبۇ نۇئەيم، ئەۋلىيالارنىڭ زىننىتى 2\41)

The post ئانام ھىجابلانماسلىقىمنى، كىنو – فىلىم كۆرۈشۈمنى تەلەپ قىلىدۇ، ئىتائەت قىلىمەنمۇ؟ first appeared on مۇجتەھىد پەتىۋا تورى.

The post ئانام ھىجابلانماسلىقىمنى، كىنو – فىلىم كۆرۈشۈمنى تەلەپ قىلىدۇ، ئىتائەت قىلىمەنمۇ؟ appeared first on مۇجتەھىد پەتىۋا تورى.

ئاللاھقا ھەمدۇ – سانالار بولسۇن، رەسۇلۇللاھ سەللەللاھۇ ئەلەيھى ۋەسەللەمگە ئاللاھنىڭ سالات ۋە سالاملىرى بولسۇن.

رەسۇلۇللاھ سەللەللاھۇ ئەلەيھى ۋەسەللەم ئاياللارنىڭ ئاممىۋى مۇنچىغا بېرىشىنى چەكلىگەن. ئاممىۋى مۇنچىنىڭ ھۆكمى ئاممىۋى سۇ ئۈزۈش كۆلچەكلىرىنىڭ ھۆكمى بىلەن ئوخشاش.
جابىر رەزىيەللاھۇ ئەنھۇ ھەدىس سۆزلەپ، رەسۇلۇللاھ سەللەللاھۇ ئەلەيھى ۋەسەللەمنىڭ مۇنداق دېگەنلىكىنى خەۋەر قىلغان: «ئاللاھقا ۋە ئاخىرەت كۈنىگە ئىمان ئېيتقان كىشى ئايالىنى ئاممىۋى مۇنچىغا كىرگۈزمىسۇن؛ ئاللاھقا ۋە ئاخىرەت كۈنىگە ئىمان ئېيتقان ئەر ئاممىۋى مۇنچىغا كىرسە، بېلىنىڭ ئاستىنى ئوراپ تۇرىدىغان كىيىم بولۇش شەرتى بىلەن كىرسۇن؛ ئاللاھقا ۋە ئاخىرەت كۈنىگە ئىشەنگەن كىشى ھاراق ئىچىلىدىغان داستىخاندا ئولتۇرمىسۇن.» hedisim.com (ئەھمەد، تىرمىزى، تەبرانى، ئەبۇ يەئلا قاتارلىق ئىماملار توپلىغان؛ ھاكىم: مۇستەدرەك 7779؛ ھاكىم، زەھەبى، ئەلبانى سەھىھ دېگەن) | ھەدىس خەزىنىسى تورى تەرجىمە قىلىپ تارقاتتى | ھەدىسنىڭ ئەرەپچە تېكىستى: مَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يُدْخِلْ حَلِيلَتَهُ الْحَمَّامَ، وَمَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يَدْخُلِ الْحَمَّامَ إِلَّا بِمِئْزَرٍ، وَمَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يَجْلِسْ عَلَى مَائِدَةٍ يُدَارُ عَلَيْهَا الْخَمْرُ» هَذَا حَدِيثٌ صَحِيحٌ عَلَى شَرْطِ مُسْلِمٍ وَلَمْ يُخَرِّجَاهُ

بۇ ھەدىس ئاممىۋى سۇ ئۈزۈش كۆلچىكىگىمۇ قىياس قىلىنىدۇ. ھاۋا ئىسسىپ كەتتى. ئاياللار ئاممىۋى سۇ ئۈزۈش كۆلچىكىگە بېرىپ سۇ ئۈزۈش كىيىمى بىلەن سۇ ئۈزىدىغان ئەھۋاللارغا قارىتا شىكايەتلەر ئاۋۇپ كەتتى. «ئۇ يەردە يات ئەر بولمىسا» دەپ شىكايەت قىلىنىشى مۇمكىن. ئەمما، بۇ ھەدىستە رەسۇلۇللاھ ئاياللارنى ئاممىۋى مۇنچىغا بېرىشتىنمۇ چەكلىدى، ئاياللارنىڭ مۇنچىسىدا مۇتلەق رەۋىشتە يات ئەر بولۇشىغا قارىماي ئاياللارنى بۇنىڭدىن چەكلىدى. چۈنكى بۇنداق قىلىش ئىپپەت – ھاياغا زىت، ھارامغا يول ئاچىدۇ. ئاياللار ئۆز ئۆيىدىن باشقا يەردە كىيىمىنىڭ بىر قىسىمىنى ياكى كۆپ قىسىمىنى سېلىۋەتسە، ياكى بەدەن شەكلى كۆرۈنۈپ تۇرىدىغان تارك كىيىملەرنى كىيسە — بۇ ئۇلارنىڭ ھاياسىنى زېدىلەيدۇ.
ئايال كىشى دېڭىزدا ياكى ئاممىۋى سۇ ئۈزۈش كۆلچىكىدە سۇ ئۈزۈش كۆلچىكىدە ۋەقەگە ئۇچرايدىغان ئىش يۈز بەرسە ئەر ئىشلەمچىلەر سۈزۈپ چىقىدۇ.  ياكى ئاممىۋى سۇ ئۈزۈش كۆلچىكىدە سۇ ئۈزگەن خانىم – قىزلارنى يات ئەرلەر كۆرۈپ قالىدىغان ئىش يۈز بېرىدۇ. ياكى بىر ئايال باشقا بىر ئايالنىڭ بەدەن شەكلىنى باشقا ئەرلەرگە سۈپەتلەپ بېرىدۇ، نەتىجىدە ئۇ يات ئەر ئۇ ئايالنى – ھەدىستە كەلگەندەك – ئۆز كۆزى بىلەن كۆرگەندەك بولىدۇ. بۇلارنىڭ ھەممىسى ئىپپەت ھاياغا زىت، ھارامغا يول ئاچىدىغان مۇنكەر ئىشلار. ئاللاھ مۇسۇلمان خانىم قىزلارنى ئىپپەت ھايادىن، ئۇلارنىڭ ئەرلىرىنى، دادىلىرىنى ۋە قېرىنداشلىرىنى كۈنلەمچىلىك ئەخلاقىدىن ئايرىمىسۇن. رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «قايسى بىر ئايال ئۆز ئۆيىدىن باشقا جايدا كىيىمىنى سالسا، ئۆزى بىلەن ئاللاھ ئارىسىدىكى پەردىنى يىرتىپ تاشلىغان بولىدۇ.» تۆۋەندە مۇشۇ ھەقتىكى ھەدىس نەقىل قىلىنىدۇ.

عَنْ أَبِي الْمَلِيحِ، قَالَ دَخَلَ نِسْوَةٌ مِنْ أَهْلِ الشَّامِ عَلَى عَائِشَةَ – رضى الله عنها – فَقَالَتْ مِمَّنْ أَنْتُنَّ قُلْنَ مِنْ أَهْلِ الشَّامِ . قَالَتْ لَعَلَّكُنَّ مِنَ الْكُورَةِ الَّتِي تَدْخُلُ نِسَاؤُهَا الْحَمَّامَاتِ قُلْنَ نَعَمْ . قَالَتْ أَمَا إِنِّي سَمِعْتُ رَسُولَ اللَّهِ صلى الله عليه وسلم يَقُولُ  » مَا مِنِ امْرَأَةٍ تَخْلَعُ ثِيَابَهَا فِي غَيْرِ بَيْتِهَا إِلاَّ هَتَكَتْ مَا بَيْنَهَا وَبَيْنَ اللَّهِ تَعَالَى «

ئەبۇ مەلىيھ رەھىمەھۇللاھ ھەدىس سۆزلەپ مۇنداق دېگەن: (شامغا تەۋە) ھىمس دېگەن يۇرتتىن كەلگەن بىر بۆلۈك ئايال ئائىشە رەزىيەللاھۇ ئەنھانىڭ يېنىغا كەلدى. ئائىشە رەزىيەللاھۇ ئەنھا ئۇلاردىن «سىلەر قەيەردىن كەلدىڭلار؟» دەپ سورىۋىدى، ئۇلار «شام دىياردىن كەلدۇق» دېدى. ئائىشە رەزىيەللاھۇ ئەنھا «سىلەر ئاياللىرى ھاممامغا كىرىدىغان يۇرتتىن كەلگەن بولۇشۇڭلار مۇمكىن» دېۋىدى، ئۇلار «شۇنداق» دېدى. ئاقىۋەتتە، ئائىشە رەزىيەللاھۇ ئەنھا مۇنداق دېدى: مەن رەسۇلۇللاھ سەللەللاھۇ ئەلەيھى ۋەسسەللەمنىڭ مۇنداق دېگەنلىكىنى ئاڭلىغانمەن: «قايسى بىر ئايال ئۆز ئۆيىدىن باشقا جايدا كىيىمىنى سالسا، ئۆزى بىلەن ئاللاھ ئارىسىدىكى پەردىنى يىرتىپ تاشلىغان بولىدۇ.» hedisim.com (ئەبۇ داۋۇد: سۇنەن، بەيھەقى: سۇنەن كۇبرا؛ تىرمىزى: سۇنەن؛ ئەبۇ داۋۇد تەيالىسىي: مۇسنەد؛ دارىمىي: مۇسنەد؛ تەبرانى: مۇئجەم كەبىر؛ سەھىھ ھەدىس) — ھەدىس خەزىنىسى تورى تەرجىمە قىلىپ تارقاتتى

ئاياللارنىڭ ھاممامىدا ئەر كىشى يوق. ئاياللار ھاممامىدا ئۇلارنىڭ ئوچۇق تۇرغان بەدىنىنى يات ئەر كىشى كۆرمەيدۇ. شۇنداق تۇرۇغلۇق رەسۇلۇللاھ سەللەللاھۇ ئەلەيھى ۋەسسەللەم ئاياللار ھاممامىغا كىرىدىغان ئاياللارنى «ئاللاھ بىلەن ئۆزى ئارىسىدىكى پەردىنى يىرتقۇچى ئاياللار» يەنى ئاسىي ئاياللار دەپ سۈپەتلىگەن. ئۇنداقتا، كۈنىمىزدىكى، بەدەن ئەزالىرىنى ئوچۇق قويۇپ، ئەرلەرنىڭ خالىغانچە كۆرۈشىگە سۇنغان، بەدەن ئەزالىرىنى يات ئەرلەردىن يوشۇرماستىن كوچىغا چىقىدىغان ئاياللار — ئاياللار ھامماممىغا كىرگەن ئاياللاردىن تېخىمۇ بەك تەنقىتلىنىشكە ھەقلىقتۇر. بۇنداق ئاياللارنىڭ ئاللاھقا بولغان ئاسىيلىقى — ئاياللار ھاممامىغا كىرىشنى ئادەت قىلغان ئاياللارنىڭكىدىن مىڭلارچە ھەسسە ئۈستۈندۇر. ئوچۇق بەدەننى يېپىش، ئىسلامغا ئۇيغۇن كىيىنىش ھەر بىر قىز-ئايالغا پەرزدۇر. مەزكۇر ھەدىستە «ئۆز ئۆيىدىن باشقا جايدا كىيىمىنى سالغان ئايال» دەپ كەلگەن بولۇپ، كىيىشكە تېگىشلىك ئىسلامىي پۈركەنجىسىنى سېلىۋېتىپ (يەنى كىيمەستىن) سىرتقا چىققان ئايال بۇ ھەدىستىكى ئايالنىڭ دەل ئۆزىدۇر. باشقا بىر سەھىھ ھەدىستە بۇنداق ئاياللار «جەننەتنىڭ پۇرىقىنىمۇ پۇرىيالمايدۇ» دەپ كەلگەن.
— مۇجتەھىد تورى

The post ئاياللار ئاممىۋى سۇ ئۈزۈش كۆلچىكىگە بېرىپ سۇ ئۈزسە بولامدۇ؟ first appeared on مۇجتەھىد پەتىۋا تورى.

The post ئاياللار ئاممىۋى سۇ ئۈزۈش كۆلچىكىگە بېرىپ سۇ ئۈزسە بولامدۇ؟ appeared first on مۇجتەھىد پەتىۋا تورى.

پەتىۋا بەرگۈچى: ئىمام ئابدۇلئەزىز ئىبنى باز رەھىمەھۇللاھ

سوئال: ساقالنى قارىغا بوياش ھەققىدە كەلگەن ھەدىسلەرنىڭ سەھىھلىك دەرىجىسى قانداق؟ چۈنكى ئىلىم ئەھلى دەپ قارىلىدىغان نۇرغۇن كىشىلەر ئارىسىدا ساقالنى قارىغا بوياش ئومۇملىشىپ كەتتى.

جاۋاب: بۇ ھەقتە نۇرغۇنلىغان سەھىھ ھەدىسلەر بار. ئۇلارنىڭ ئەڭ مەشھۇرى ئەبۇ بەكرى سىددىق رەزىيەللاھۇ ئەنھۇنىڭ دادىسى (ئەبۇ قۇھافە) توغرسىدىكى ۋەقەدە كەلگەن ھەدىستۇر. ئىمام مۇسلىم جابىر ئىبنى ئابدۇللاھ رەزىيەللاھۇ ئەنھۇدىن رىۋايەت قىلىدۇكى، پەيغەمبەر ئەلەيھىسسالام ئەبۇ بەكرى سىددىقنىڭ دادىسىنىڭ چاچ-ساقاللىرىنىڭ خۇددى «سۇغامە» (ئاپاق بىر خىل ئۆسۈملۈك) تەك ئاقىرىپ كەتكەنلىكىنى كۆرۈپ: ((غيروا هذا بشيء واجتنبوا السواد)) «بۇنى (بۇ ئاقلىقنى) بىرەر نەرسە بىلەن ئۆزگەرتىڭلار، ئەمما قارىدىن ساقلىنىڭلار» دېگەن. يەنە بىر ھەدىستە: ((وجنبوه السواد)) «چاچ – ساقالنى قارىدىن يىراق تۇتۇڭلار» دەپ كەلگەن.

يەنە بىر ھەدىس ئىبنى ئابباس رەزىيەللاھۇ ئەنھۇمادىن رىۋايەت قىلىنغان بولۇپ، ئىمام ئەھمەد، ئەبۇ داۋۇد ۋە نەسائىيلار سەھىھ سەنەد بىلەن رىۋايەت قىلغان. پەيغەمبەر ئەلەيھىسسالام مۇنداق دېگەن: ((: سيكون في آخر الزمان قوم يخضبون بالسواد كحواصل الحمام لا يريحون رائحة الجنة )) «ئاخىر زاماندا (ساقاللىرىنى) كەپتەرنىڭ چاغدانلىرىدەك قارىغا بويايدىغان بىر قەۋم چىقىدۇ، ئۇلار جەننەتنىڭ پۇرىقىنىمۇ پۇرىيالمايدۇ.» بۇ ئىنتايىن ئېغىر بىر تەھديدتۇر.

بۇ جەھەتتە باشقا ھەدىسلەرمۇ بار بولۇپ، ئۇلارنىڭ ھەممىسى چاچ – ساقالنى قارىغا بوياشنىڭ ھاراملىقىنى، ئەمما قارىدىن باشقا رەڭلەردە بوياشنىڭ دۇرۇسلۇقىنى كۆرسىتىپ بېرىدۇ. — مۇجتەھىد تورى تەرجىمە قىلىپ تارقاتتى

مەنبە: https://binbaz.org.sa/fatwas/458/%D8%B5%D8%A8%D8%BA-%D8%A7%D9%84%D9%84%D8%AD%D9%8A%D8%A9-%D8%A8%D8%A7%D9%84%D8%B3%D9%88%D8%A7%D8%AF

ئىمام شافىي رەھىمەھۇللاھ مۇنداق دېگەن: «كىتابىمدا ئاللاھنىڭ رەسۇلىنىڭ سۈننىتىگە زىت بىرەر نەرسە بايقىساڭلار، ئاللاھنىڭ رەسۇلىنىڭ سۈننىتى بويىچە ئەمەل قىلىڭلار، مېنىڭ بۇ ھەقتىكى كۆز قارىشىمنى تاشلاڭلار.» mujtehid.com (النووي في المجموع ١ / ٦٣)

ئىمام شافىي رەھىمەھۇللاھ مۇنداق دېگەن: (إذا صح الحديث فهو مذهبي) «ئەگەر ھەدىس سەھىھ بولسا، ئۇ مېنىڭ مەزھىبىمدۇر.» mujtehid.com (النووي ١ / ٦٣،صفة صلاة النبي صلى الله عليه وسلم – الألباني)

ئىمام شافىي رەھىمەھۇللاھ مۇنداق دېگەن: «مۇسۇلمانلارنىڭ ھەممىسى شۇنىڭغا ئىتتىپاققا كەلدىكى، ئەگەر بىر كىشىگە رەسۇلۇللاھ سەللەللاھۇ ئەلەيھى ۋەسسەللەمنىڭ سۈننىتىدىن بىرى يەتسە، ئۇ كىشىنىڭ رەسۇلۇللاھ سەللەللاھۇ ئەلەيھى ۋەسسەللەمنىڭ سۈننىتىنى تاشلاپ، باشقىلارنىڭ سۆزلىرىگە ئېسىلىۋېلىشى ھالال ئەمەس.» mujtehid.com (الفلاني: إيقاظ همم ٦٨،  الألباني: صفة صلاة النبي صلى الله عليه وسلم)

ئىمام ئەھمەد رەھىمەھۇللاھ مۇنداق دېگەن:  (من رد حديث رسول الله ﷺ فهو على شفا هلكة) «كىم ئاللاھنىڭ رەسۇلىنىڭ ھەدىسىنى قوبۇل قىلمىسا، ئۇ ھالاكەتنىڭ بوسۇغىسىدىدۇر.» mujtehid.com (ابن الجوزي في المناقب (ص ١٨٢)

ئىمام ئەبى ھەنىفە رەھىمەھۇللاھ مۇنداق دېگەن:(إذا صح الحديث فهو مذهبي) «ئەگەر ھەدىس سەھىھ بولسا، ئۇ مېنىڭ مەزھىبىمدۇر.» mujtehid.com  (ابن عابدين في «الحاشية» ١ / ٦٣)

The post چاچ – ساقالنى قارا رەڭدە بوياشنىڭ ھۆكمى first appeared on مۇجتەھىد پەتىۋا تورى.

The post چاچ – ساقالنى قارا رەڭدە بوياشنىڭ ھۆكمى appeared first on مۇجتەھىد پەتىۋا تورى.

پەتىۋا بەرگۈچى: مۇھەددىس، فەقىھ، ئىمام ئىبنى باز رەھىمەھۇللاھ

جاۋاب: ياق، ئەگەر ئۇ (بۇنىڭ چەكلەنگەنلىكىنى) بىلمەي قىلغان بولسا، ھېچقانداق جازا كەلمەيدۇ. ئەمما ھەج – ئۆمرىدە ئايال كىشىنىڭ نىقاب كىيشىنىڭ (سەھىھ سۈننەتتە) چەكلەنگەنلىكىنى بىلىپ تۇرۇپ قەستەن قىلغان بولسا، ئۈچ سا (ئاشلىق)نى ئالتە مىسكىنگە سەدىقە قىلىشى ۋاجىپ بولىدۇ. يەنى ئالتە مىسكىننىڭ ھەر بىرىگە يېرىم سا (تەخمىنەن بىر كىلو يېرىم)دىن ئاشلىق بېرىدۇ. ياكى ئۈچ كۈن روزا تۇتىدۇ، ياكى بىر قوي سويىدۇ. بۇ ھۆكۈم، ئايال كىشى ئېھراملىق ھالەتتە نىقاب تاقاشنىڭ جائىز ئەمەسلىكىنى بىلىپ تۇرۇپ، قەستەن تاقىغان ئەھۋال ئۈچۈندۇر.(1) (شەيخنىڭ پەتىۋاسى ئاخىرلاشتى)

ئىمام نەۋەۋى «المجموع شرح المهذب» ناملىق ئەسىرىدە مۇنداق دېگەن:
ئىمام شافىئىي <ئەلئۇم> ناملىق ئەسىرىدە مۇنداق دېگەن، شۇنداقلا بۇ شافىي مەزھىبى ئالىملىرىنىڭمۇ ھۆكمىدۇر: <ئايال كىشىنىڭ (سەفا بىلەن مەرۋە ئارىسىدا) كېچىسى سەي قىلىشى مۇستەھەبتۇر. چۈنكى كېچىسى (بۇ ئىبادەتنى قىلىش) ئاياللارنى يات ئەرلەردىن تېخىمۇ يوشۇرىدۇ، ئەزالىرىنىڭ يات ئەرلەرگە كۆرۈنمەسلىكى ئۈچۈن تېخىمۇ بىخەتەر بولىدۇ، شۇنداقلا ئاياللارنىڭ كېچسى سەئىي قىلىشى ئۆزى ۋە باشقىلار ئۈچۈن پىتنىدىن تېخىمۇ ئۇزاق بولىدۇ. شۇنداقتىمۇ، ئايال كىشىنىڭ كۈندۈزى تاۋاپ قىلىشىمۇ جائىز. لېكىن، ھەج – ئۆمرە قىلغۇچى ئايال يۈزنى يېپىپ تۇرىدىغان رەخت قاتارلىقلارنى، يۈز تېرىسىگە چاپلىۋالمىغان ھالدا (بېشىنىڭ ئۈستىدىن) ساڭگىلىتىش ئارقىلىق يۈزىنى ياپىدۇ. mujtehid.com (المجموع شرح المهذب 8\75)

مەزمۇنغا مۇناسىۋەتلىك بەزى ھەدىسلەر:

«ھەجدە يۈز يېپىشقا بولمايدۇ» ھۆكمى سەھىھ سۈننەتكە ئۇيغۇن كەلمەيدىغان خاتا ھۆكۈم بولۇپ، دىنىي مەسىلىدە ئىختىلاپ بولغاندا رەسۇلۇللاھنىڭ سۈننىتىگە قايتىش ھەر بىر مۆمىن مۇسۇلمان ئۈچۈن پەرز ئەين. مۇنۇ ھەدىس ئىختىلاپلىق مەسىلىدە سەھىھ سۈننەتكە ئۇيغۇن ھۆكۈمنى تۇتۇشنىڭ پەزلىكىنى بىلدۈرىدۇ. 

رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: «سىلەردىن ھايات ياشايدىغانلار نۇرغۇن ئىختىلاپلارنى كۆرىدۇ. (ئۇ ھالدا) سىلەر مېنىڭ سۈننىتىمگە ۋە ھىدايەتكە ئېرىشكەن راشىد خەلىپىلىرىمنىڭ سۈننىتىگە ئەگىشىشىڭلار.» hedisim.com (ئەبۇ داۋۇد 4607؛ تىرمىزى 2676؛ ئەھمەد 17142، 17044؛ ئەھمەد شاكىر ۋە باشقا مۇھەددىسلەر سەھىھ دېگەن)

مۆمىنلەرنىڭ ئانىسى ئائىشە رەزىيەللاھۇ ئەنھا مۇنداق دېگەن: ((تَلْبَسُ الْمُحْرِمَةُ مَا شَاءَتْ مِنَ الثِّيَابِ إلَّا الْبُرْقُعَ وَالْقُفَّازَيْنِ وَلَا تَنَقَّبُ)) «(ھەج ياكى ئۆمرە ئۈچۈن) ئىھراملىق ئايال خالىغان بۇرقا، پەلەيدىن باشقا خالىغان كىيىمنى كىيسە بولىدۇ، شۇنداقلا نىقاب تاقىۋالسا بولمايدۇ.» hedisim.com (مۇسەننەف ئىبنى ئەبى شەيبە 17067)

ئابدۇللاھ ئىبنى ئۆمەر رەزىيەللاھۇ ئەنھۇ ھەدىس سۆزلەپ، رەسۇلۇللاھ سەللەللاھۇ ئەلەيھى ۋەسەللەمنىڭ مۇنداق دېگەنلىكىنى بايان قىلغان: ((وَلاَ تَنْتَقِبِ الْمَرْأَةُ الْمُحْرِمَةُ وَلاَ تَلْبَسِ الْقُفَّازَيْنِ)) «ئىھراملىق ئايال (يۈزىگە) نىقاب تاقىمىۋالمىسۇن، قوللىرىغا پەلەي كىيىۋالمىسۇن.» hedisim.com (بۇخارى 1838؛ مالىك 724؛ ئەبۇ داۋۇد 1825؛ تىرمىزى 833؛ نەسائىي 2673؛ ئىبنى خۇزەيمە 2437؛ نەسائىي: سۇنەن كۇبرا 3542؛ بەيھەقى: سۇنەن كۇبرا 8361)

يۇقىرىقى ھەدىس ھىجاپ ئايىتىنىڭ ھۆر ئاياللارنىڭ يۈزىنى يېپىش ئۈچۈن نازىل بولغىنىنى ئوچۇق كۆرسىتىپ بېرىدۇ. چۈنكى، ھەدىستە ئىھراملىق ئايال نىقاپ ۋە پەلەي تاقاشتىن توسۇلغان. بۇ ئاياللارنىڭ ئىھراملىق ھالىتىدىن باشقا چاغدا نامەھرەملەر كۆرۈش ئېھتىمالى بولغان ئەھۋالدا يۈزىگە نىقاب، قولىغا پەلەي تاقايدىغانلىقىنى، يەنى ئاياللار ئۈچۈن نىقاپ ۋە پەلەينىڭ خۇددى ئەرلەر ئۈچۈن ئىزار، تون، يەكتەكلەردەكلا ئومۇملاشقانلىقىنى كۆرسىتىدۇ. ئەرلەرنىڭ ھەج – ئۆمرىدە تون، يەكتەك، ئىشتان كىيشتىن چەكلەنگەنلىكى — ھەج – ئۆمرە قىلغان ئەرنىڭ بەدىنىنى ئوچۇق قويۇپ، قىپيالىڭاچ بولىۋېلىشىنى بىلدۈرمىگەندەك، ئاياللارنىڭ ھەج – ئۆمرىدە نىقاب ۋە پەلەي تاقاشتىن چەكلىنىشى — ھەجدە – ئۆمرە قىلغان ئايالنىڭ يۈزى ۋە قولىنى ئوچۇق قويۇشى كېرەكلىكىنى بىلدۈرمەيدۇ. ئائىشە ئانىمىزنىڭ تۆۋەندىكى ھەدىسىمۇ بۇنى ئوچۇق كۆرسىتىپ بېرىدۇ.

(بۈيۈك ساھابە زۇبەير ئىبنى ئاۋۋامنىڭ نەۋرىسى، ئايال تابىئىن ئالىمە) فاتىمە بىتنى مۇنزىر (ئاللاھ رەھمەت قىلسۇن) مۇنداق دېگەن: ((كُنَّا نُخَمِّرُ وُجُوهَنَا وَنَحْنُ مُحْرِمَاتٌ، وَنَحْنُ مَعَ أَسْمَاءَ بِنْتِ أَبِي بَكْرٍ الصِّدِّيقِ)) «بىز ئېھراملىق ھالەتتە يۈزىمىزنى ياپاتتۇق. بىز (ئېھراملىق ۋە يۈز ياپقان ھالەتتە) ئەسما بىتنى ئەبۇ بەكرى سىددىقمۇ بىز بىلەن بىللە ئىدۇق.» hedisim.com (مالىك: مۇۋەتتا 224، 724؛ ھاكىم: مۇستەدرەك 1\454؛ سەھىھ) * ئەبۇ بەكرى سىددىقنىڭ قىزى ئەسما بىنتى ئەبۇ بەكرى سىددىق رەزىيەللاھۇ ئەنھا — فاتىمە بىنتى مۇنزىرنىڭ چوڭ ئانىسى ھېسابلىنىدۇ. ئەسما رەزىيەللاھۇ ئەنھا يەنە مۇشۇ ئەسەرنى نەقىل قىلغان فاتىمە بىنتى مۇنزىرنىڭ ئېرى ھىشام ئىبنى ئۇرۋە ئىبنى زۇبەيرنىڭمۇ چوڭ ئانىسىدۇر. (شرح الزرقاني على الموطأ ٢/٣٤٩)

ئائىشە بىنتى ئەبۇ بەكرى سىددىق رەزىيەللاھۇ ئەنھا مۇنداق دېگەن: ((كَانَ الرُّكْبَانُ يَمُرُّونَ بِنَا وَنَحْنُ مَعَ رَسُولِ اللَّهِ صَلَّى اللَّهُ عَلَيْهِ وَسَلَّمَ مُحْرِمَاتٌ فَإِذَا جَاوَزُوا بِنَا سَدَلَتْ إِحْدَانَا جِلْبَابَهَا مِنْ رَأْسِهَا عَلَى وجهِها فإِذا جاوزونا كشفناهُ)) «بىز رەسۇلۇللاھ سەللەللاھۇ ئەلەيھى ۋەسسەللەم بىلەن (ھەج سەپىرىدە) بىللە ئىھرام باغلاپ (ھەج قىلىۋاتقان) ئىدۇق ۋە كىشىلەر ئۇلاغلىرىغا مىنىپ يېنىمىزدىن ئۆتەتتى. ئۇلار يېنىمىزدىن ئۆتكۈدەك بولسا جىلبابىمىزنى سارقىتىپ يۈزىمىزنى يېپىۋالاتتۇق، ئۇلار ئۆتۈپ كەتكەندە يۈزىمىزنى ئاچاتتۇق.» hedisim.com (ئەبۇ داۋۇد <1833> ۋە ئىبنى ماجە توپلىغان؛ مىشكات مەسابىھ 2690؛ وقال الألباني في «جلباب المرأة المسلمة» (ص107)حسن في الشواهد)

ئىمام شافىي رەھىمەھۇللاھ مۇنداق دېگەن: «سىلەر رەسۇلۇللاھ سەللەللاھۇ ئەلەيھى ۋەسسەللەمنىڭ بىر سۈننىتىنى تاپساڭلار، شۇ سۈننەتكە ئەگىشىڭلار (يەنى بويىچە ئەمەل قىلىڭلار.) كىشىلەردىن ھېچقانداق بىرىنى (يەنى ھېچقانداق بىرىنىڭ سۈننەتكە ئۇيغۇنسىز ھۆكمىنى) ئېتىبارغا ئالماڭلار.» mujtehid.com (ذم الكلام للهروي 3\15)

ئابدۇللاھ ئىبنى مەسئۇد رەزىيەللاھۇ ئەنھۇ ھەدىس بايان قىلىپ مۇنداق دېگەن، رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: (( المُتَمَسِّكُ بِسُنَّتِي عِنْدِ اخْتِلاَفِ أُمَّتِي كَالْقَابِضِ عَلَى الجمر)) «ئۈممىتىم (قۇرئان – سۈننەتكە مەھكەم ئېسىلىشتىن چەتنەپ) ئىختىلاپقا چۈشكەن ۋاقىتتا سۈننىتىمگە مەھكەم ئېسىلغۇچى خۇددى چوغنى سىقىمداپ تۇتۇپ تۇرغان كىشىگە ئوخشايدۇ.» hedisim.com (ئەلبانى: سەھىھ جامىئۇس سەغىر 6676)

نەقىل مەنبەلىرى:
(1)
https://binbaz.org.sa/fatwas/14817/%D8%AD%D9%83%D9%85-%D9%84%D8%A8%D8%B3-%D8%A7%D9%84%D9%85%D8%B1%D8%A7%D8%A9-%D8%A7%D9%84%D9%85%D8%AD%D8%B1%D9%85%D8%A9-%D9%84%D9%84%D9%86%D9%82%D8%A7%D8%A8

The post نىقاب تاقىغان ھالدا ھەج ياكى ئۆمرە قىلغان ئايالغا بىرەر جازا (فىديە) كېلەمدۇ؟ first appeared on مۇجتەھىد پەتىۋا تورى.

The post نىقاب تاقىغان ھالدا ھەج ياكى ئۆمرە قىلغان ئايالغا بىرەر جازا (فىديە) كېلەمدۇ؟ appeared first on مۇجتەھىد پەتىۋا تورى.

پەتىۋا بەرگۈچى ئىمام ئىبنى باز رەھىمەھۇللاھ

ئىمام ئىبنى باز رەھىمەھۇللاھ بۇ ھەقتىكى سوئالغا مۇنداق جاۋاب بەرگەن:

«ئەگەر (بامداتنىڭ) سۈننىتىنى ئۆيىڭىزدە ئوقۇپ بولۇپ مەسجىدكە كەلگەن بولسىڭىز، ناماز تېخى باشلانمىغان بولسا، ئولتۇرۇشتىن بۇرۇن ئىككى رەكئەت ناماز ئوقۇشۇڭىز شەرىئەتتە يولغا قويۇلغاندۇر. چۈنكى، ئەبۇ قەتادە رەزىيەللاھۇ ئەنھۇ ھەدىس سۆزلەپ، رەسۇلۇللاھ سەللەللاھۇ ئەلەيھى ۋەسەللەمنىڭ مۇنداق دېگەنلىكى خەۋەر قىلغان: ((إِذَا دَخَلَ أَحَدُكُمُ الْمَسْجِدَ فَلاَ يَجْلِسْ حَتَّى يُصَلِّيَ رَكْعَتَيْنِ)) «سىلەردىن بىرىڭلار مەسجىدكە كىرسە، ئىككى رەكئەت ناماز ئوقۇماي تۇرۇپ ئولتۇرمىسۇن.»1 بۇ ھۆكۈم بامدات نامىزىنى ۋە باشقا نامازلارنىمۇ ئۆز ئىچىگە ئالىدۇ. شۇڭا، ئىككى رەكئەت نامازنى ئوقۇماي تۇرۇپ ئولتۇرۇشىڭىز توغرا بولمايدۇ.

— مۇجتەھىد تورى تەرجىمە قىلىپ تارقاتتى

نەقىل مەنبەلىرى:

1. بۇخارى 1167 – نومۇرلۇق ھەدىس

پەتىۋا مەنبەسى: 

https://binbaz.org.sa/fatwas/11060/%D9%87%D9%84-%D9%8A%D8%B5%D9%84%D9%8A-%D8%AA%D8%AD%D9%8A%D8%A9-%D8%A7%D9%84%D9%85%D8%B3%D8%AC%D8%AF-%D9%85%D9%86-%D8%B5%D9%84%D9%89-%D8%B1%D8%A7%D8%AA%D8%A8%D8%A9-%D8%A7%D9%84%D9%81%D8%AC%D8%B1-%D9%81%D9%8A-%D8%A8%D9%8A%D8%AA%D9%87

The post بامدات نامىزىنىڭ سۈننىتىنى ئۆيىدە ئوقۇغان كىشى مەسجىدكە كىرسە، تەھىييەتۇل مەسجىد نامىزى ئوقۇمدۇ؟ first appeared on مۇجتەھىد پەتىۋا تورى.

The post بامدات نامىزىنىڭ سۈننىتىنى ئۆيىدە ئوقۇغان كىشى مەسجىدكە كىرسە، تەھىييەتۇل مەسجىد نامىزى ئوقۇمدۇ؟ appeared first on مۇجتەھىد پەتىۋا تورى.

پەتىۋا بەرگۈچى: ئىمام ئىبنى باز رەھىمەھۇللاھ

ئەرەپچىدىن تەرجىمە قىلغۇچى: قۇدرەت بارات

رىياسەتچىنىڭ سوئالى: قاھىرەدىن مەھمۇد ئەھمەد ئۇمەيرە مۇنداق سوئال سوراپتۇ: ئىنسان جاھالىتى سەۋەبلىك ئۆزۈرلۈك ھېسابلىنامدۇ؟ مەسىلەن، بىر كىشى بىرەر ئەۋلىيانىڭ قەبرىسىدىن بەرىكەتكە ئېرىشىش نىيىتىدە ئۇنىڭ قەبرىسىنى زىيارەت قىلسا، ئەمما بۇنىڭ چوڭ شىرك قىلمىشى ئىكەنلىكىنى بىلمىسە، بۇنداق كىشى ئۆزرىلىك ھېسابلىنامدۇ؟ قۇرئان ۋە سۈننەتتىن دەلىللەر كەلتۈرۈش ئاساسىدا بۇ مەسىلىنى چۈشەندۈرۈپ بېرىشلىرىنى سورايمىز، ئاللاھ سىلىنى مۇكاپاتلىسۇن.

ئىمام ئىبنى بازنىڭ جاۋابى:

جاۋاب: تەۋھىد ۋە شىرككە ئالاقىدار ئەقىدە مەسىلىلىرىدە مۇسۇلمانلار ئارىسىدا ياشاۋاتقان، قۇرئان ۋە ھەدىسلەرنى ئوقۇپ، ئاڭلاپ تۇرۇۋاتقان؛ ھەمدە سوراپ بىلىش ئىمكانىيىتى بار بولغان كىشى جاھالىتى (بىلمەسلىكى) سەۋەبلىك ئۆزرىلىك ھېسابلانمايدۇ. قەبرىلەرگە دۇئا قىلىش، ئۆلۈكلەردىن مەدەت سوراش (ئىستىغاسە قىلىش) ۋە شۇنىڭغا ئوخشاش ئىشلاردا ئۆزرە قوبۇل قىلىنمايدۇ. ئەكسىچە، كىشىنىڭ دىنىنى ئۆگىنىشى ۋە چوڭقۇر چۈشىنىشى ۋاجىپتۇر، بۇ مەسىلىدە سەل قاراشقا قەتئىي بولمايدۇ.

رەسۇلۇللاھ سەللەللاھۇ ئەلەيھى ۋەسەللەم جاھىلىيەت دەۋرىدە (ئىسلام كېلىشتىن بۇرۇن) ۋاپات بولغان ئانىسىغا مەغپىرەت تىلەش ئۈچۈن ئاللاھتىن ئىزىن سورىغاندا، ئاللاھ رەسۇلۇللاھنىڭ ئانىسى ئۈچۈن مەغفىرەت سورىشىغا رۇخسەت قىلمىغان. شۇنىڭدەك، بىر كىشى ئۆزىنىڭ ئاتىسى ھەققىدە سورىغاندا، پەيغەمبەر ئەلەيھىسسالام: «مېنىڭ ئاتاممۇ، سېنىڭ ئاتاڭمۇ دوزاختا» دېگەن. ھالبۇكى ئۇلار جاھىلىيەت دەۋرىدە ۋاپات بولغان ئىدى. (يەنى، دىن تولۇق يېتىپ كەلمىگەن شارائىتتا ئۆلگەنلەرنىڭ شىرك سەۋەبلىك ئەھۋالى مۇشۇنداق بولغان يەردە، مۇسۇلمانلار ئارىسىدا تۇرۇپ شىرك قىلغانلارنىڭ ئۆزرى قوبۇل قىلىنمايدۇ.)

بىر تۈركۈم ئىلىم ئەھلىلىرى مۇنداق دېگەن: بۇنىڭ سەۋەبى، پەيغەمبەر سەللەللاھۇ ئەلەيھى ۋەسەللەمنىڭ ئاتا-ئانىسى ئىبراھىم ئەلەيھىسسالامنىڭ شەرىئىتىدىن خەۋەردار ھالەتتە ۋاپات بولغان. ئىبراھىم ئەلەيھىسسالامنىڭ شەرىئىتى شىركتىن توسۇشنى ئاساس قىلاتتى. بەلكىم ئانىسىغا بۇ دەۋەت يەتكەن (ئەمما خىلاپلىق قىلغان) بولۇشى مۇمكىن، شۇڭا رەسۇلۇللاھنىڭ ئانىسى ئۈچۈن مەغپىرەت تىلىشى مەنئى قىلىنغان. بەلكىم ئاتىسىغىمۇ بۇ دەۋەت يەتكەن بولۇشى مۇمكىن، شۇڭا پەيغەمبەر ئەلەيھىسسالام: <مېنىڭ ئاتاممۇ، سېنىڭ ئاتاڭمۇ دوزاختا> دېگەن. ئەگەر پەيغەمبەر سەللەللاھۇ ئەلەيھى ۋەسەللەمنىڭ ئاتا-ئانىسى جاھىلىيەت دەۋرىدە تۇرۇپمۇ ئۆزرىلىك ھېسابلانمىغان بولسا، مۇسۇلمانلار ئارىسىدا ياشاۋاتقان، ئەتراپىدا ئۆلىمالار بار بولغان، قۇرئان ۋە ھەدىسلەرنى ئاڭلاپ تۇرۇۋاتقان كىشى قانداقمۇ ئۆزرىلىك بولسۇن؟

خۇلاسە شۇكى، قەبرىلەرگە بېرىۋېلىپ ئۇ يەردە ئېتىكاپ قىلىدىغان ۋە ئۆلۈكلەردىن مەدەت سورايدىغانلار  (بۇ قىلمىشىنىڭ ئاللاھقا شىرك كەلتۈرۈش ھېسابلىنىدىغان چوڭ شىرك ئىكەنلىكىنى بىلمەسلىكى سەۋەبلىك) ئۆزرىلىك ھېسابلانمايدۇ. ئەكسىچە، ئۇلارنىڭ دىنىنى ئۆگىنىشى ۋە ئىلىم ئەھلىدىن سورىشى ۋاجىپتۇر (ئەمما ئۇلار بۇ ۋاجىپنى ئورۇندىمىدى)، ئۇلار ئۆزلىرىنىڭ بۇ يامان ھالىتىدە چىڭ تۇرۇۋالماسلىقى ۋاجىپتۇر، چۈنكى شىركتىن ئاگاھلاندۇرغان ئايەتلەر ۋە ھەدىسلەر ئۇلارنىمۇ ئۆز ئىچىگە ئالىدۇ. (ئۇلار شىركتىن ئاگاھلاندۇرغان ئايەت – ھەدىسلەرگە پەرۋا قىلمىسا، بۇ پەرۋاسىزلىقى سەۋەبلىك ئۆزرىلىك ھېسابلانمايدۇ، بەلكى شىرك ئەھلى ھېسابلىنىدۇ.)

— مۇجتەھىد تورى تارقاتتى

مەنبە: https://binbaz.org.sa/fatwas/8242/حكم-من-زار-قبور-الاولياء-للتبرك-بها-جاهلا

The post جاھالەت سەۋەبلىك ئەۋلىيانىڭ قەبرىسىدىن بەرىكەت ئۈمۈت قىلغان كىشىنىڭ ھۆكمى first appeared on مۇجتەھىد پەتىۋا تورى.

The post جاھالەت سەۋەبلىك ئەۋلىيانىڭ قەبرىسىدىن بەرىكەت ئۈمۈت قىلغان كىشىنىڭ ھۆكمى appeared first on مۇجتەھىد پەتىۋا تورى.

سوئال: كىشى قاچان جاھالەت سەۋەبلىك ئۆزرىلىك دەپ قارىلىدۇ؟ قەبرىپەرەسلەر ئۆزرىلىك ھېسابلىنامدۇ؟

پەتىۋا بەرگۈچى: ئىمام ئىبنى باز رەھىمەھۇللاھ

جاۋاب: كىشى يوشۇرۇن، مۇرەككەپ مەسىلىلەردە، خۇسۇسەن ئادەتتىكى كىشىلەرگە ئۆگىنىپ – ئاڭقىرىپ بولغانغا قەدەر بىلەلمەي قالىدىغان بەزى شەرئىي ھۆكۈملەردە ئۆزرىلىك ھېسابلىنىدۇ. ئەمما مۇسۇلمانلار ئارىسىدا ئاشكارا مەلۇم بولغان ئىشلارغا كەلسەك، مەسىلەن، بىر كىشى مۇسۇلمانلار جەمئىيىتىدە ياشاپ تۇرۇپ: «مەن زىنانىڭ ھاراملىقىنى بىلمەپتىمەن» دېسە، ئۇ ئۆزرىلىك ھېسابلانمايدۇ. چۈنكى زىنانىڭ ھاراملىقى مۇسۇلمانلار ئارىسىدا ئېنىق مەلۇم بولغان ئىشتۇر. شۇنىڭدەك، مۇسۇلمانلار ئارىسىدا ياشاۋېتىپ: «مەن ھاراقنىڭ ھاراملىقىنى بىلمەپتىمەن» دېسە، بۇ جەھەتتىمۇ ئۆزرىلىك دەپ قارالمايدۇ. لېكىن، ئىنچىكە فىقھىي ھۆكۈملەرگە ئوخشاش، ئىلىم ئەھلى بولمىغانلىقى سەۋەبلىك كىشىلەرگە يوشۇرۇن قالىدىغان بەزى مەسىلىلەردە ئۆزرىلىك بولىدۇ.

شۇنداقلا، بىر كىشى: «ئۆلۈكلەرگە دۇئا قىلىشنىڭ ۋە ئۇلاردىن ياردەم سوراشنىڭ (ئىستىغاسە) چەكلەنگەنلىكىنى بىلمەپتىمەن» دېسە، بۇنىڭدىمۇ ئۆزرىلىك ھېسابلانمايدۇ. چۈنكى بۇ (يەنى ئاللاھقىلا ئىبادەت قىلىش ۋە ئاللاھتىنلا دۇئا ئارقىلىق ياردەم سوراش) تەۋھىدنىڭ ئەسلى ۋە دىننىڭ ئۇلىدۇر. ئاللاھ تائالا قۇرئان كەرىمنى دەل مۇشۇنداق ئاللاھقا شىرك كەلتۈرۈشنى مەنئىي قىلىش ۋە يوق قىلىش ئۈچۈن نازىل قىلغان، قۇرئاندا مۇشرىكلارنىڭ ئاللاھقا قانداق شىرك كەلتۈرگەنلىكىنى بايان قىلغان ۋە ئۇلارنىڭ قىلمىشلىرىدىن ئاگاھلاندۇرغان. (شۇڭا، قەبرىپەرەسلەر ئۆزرىلىك ھېسابلانمايدۇ.)

— قۇدرەت بارات تەرجىمە قىلدى

مەنبە: https://binbaz.org.sa/fatwas/8243/الامور-التي-يعذر-فيها-المسلم-بالجهل

The post مۇسۇلمان قاچان جاھالەت سەۋەبلىك ئۆزرىلىك بولىدۇ، قەبرىپەرەسلەر ئۆزرىلىكمۇ؟ | ئىمام ئىبنى باز پەتىۋاسى first appeared on مۇجتەھىد پەتىۋا تورى.

The post مۇسۇلمان قاچان جاھالەت سەۋەبلىك ئۆزرىلىك بولىدۇ، قەبرىپەرەسلەر ئۆزرىلىكمۇ؟ | ئىمام ئىبنى باز پەتىۋاسى appeared first on مۇجتەھىد پەتىۋا تورى.

سوئال: ھۆرمەتلىك شەيخ، سىلىنىڭ بولۇپمۇ ئەقىدە مەسىلىسىدە بىلمەسلىك (جاھىللىق) سەۋەبلىك ئۆزرىلىك سانىلىش ھەققىدىكى قاراشلىرى قانداق؟ بىزگە بۇ مەسىلىنى ئېنىق بايان قىلىپ بەرگەن بولسىلا؟ ئاللاھ سىلىگە ياخشىلىق ئاتا قىلسۇن.

جاۋاب: ئەقىدە ئىشلارنىڭ ئەڭ مۇھىمى ۋە ۋاجىپلارنىڭ ئەڭ چوڭىدۇر. ئىسلام ئەقىدىسىنىڭ ھەقىقىتى: ئاللاھقا، ئاللاھنىڭ پەرىشتىلىرىگە، ئاللاھنىڭ كىتابلىرىغا، ئەلچىلىرىگە، ئاخىرەت كۈنىگە ۋە تەقدىرنىڭ ياخشى-يامانلىقىغا ئىمان كەلتۈرۈشتۇر. شۇنداقلا، ئاللاھ سۇبھانەھۇ ۋەتائالانىڭ ئىبادەتكە لايىق بىردىنبىر مەبۇد ئىكەنلىكىگە ئىمان كەلتۈرۈش ۋە بۇنىڭغا گۇۋاھلىق بېرىشتۇر — يەنى «لا ئىلاھە ئىللەللاھ» (ئاللاھتىن باشقا ئىبادەت قىلىنىشقا لايىق ھەق مەبۇد يوق) دەپ گۇۋاھلىق بېرىشتۇر. مۆمىن كىشى ئاللاھ سۇبھانەھۇ ۋەتائالادىن باشقا ھېچقانداق ھەق مەبۇد (ئىبادەت قىلىنغۇچى) يوقلۇقىغا گۇۋاھلىق بېرىدۇ. شۇنىڭ بىلەن بىرگە، مۇھەممەد سەللەللاھۇ ئەلەيھى ۋەسەللەمنىڭ ئاللاھنىڭ ئەلچىسى ئىكەنلىكىگە، ئاللاھنىڭ ئۇنى ئىككى تۈرلۈك مەخلۇقاتقا — جىن ۋە ئىنسانلارغا ئەۋەتكەنلىكىگە ۋە ئۇنىڭ پەيغەمبەرلەرنىڭ خاتىمىسى (ئاخىرقىسى) ئىكەنلىكىگە گۇۋاھلىق بېرىشتۇر.

يۇقىرىقىلارنىڭ ھەممىسى چوقۇم كىشىدە بولۇشى شەرت بولغان، ئەقىدىنىڭ ئەڭ جەۋھەر قىسمىدۇر. ئەر-ئايال ھەممەيلەننىڭ چوقۇم بىلىشى شەرتتۇر. چۈنكى بۇ ھەق دىننىڭ ئاساسىدۇر. يەنە ئاللاھ ۋە رەسۇلى قىيامەت ئىشلىرىدىن خەۋەر بەرگەن جەننەت، دوزاخ، ھېساب-كىتاب، مۇكاپات-جازا، ئەمەل دەپتەرلىرىنىڭ تارقىتىلىشى ۋە ئۇنى ئوڭ ياكى سول قول بىلەن ئېلىش، ئەمەللەرنىڭ تارازىغا تارتىلىشى… قاتارلىق قۇرئان ئايەتلىرى ۋە نەبەۋىي ھەدىسلىرىدە كەلگەن غەيبىي ئىشلارغا ئىمان كەلتۈرۈش ھەممەيلەنگە ۋاجىپتۇر.

بۇ ئىشلارنى بىلمەسلىك ئۆزرە سانالمايدۇ. ئەكسىچە كىشىنىڭ بۇ ئىشلارنى ئۆگىنىشى ۋە بۇ ھەقتە توغرا بىلىمگە ئېرىشكەن بولۇشى ۋاجىپتۇر. بىر كىشى مۇسۇلمانلار ئارىسىدا ياشاۋاتقان، شۇنداقلا ئاللاھنىڭ كىتابى ۋە پەيغەمبىرىنىڭ سۈننىتى ئۇنىڭغا يەتكەن تۇرۇپ: «مەن بۇلارنى بىلمەيتتىم» دېگەن سۆزى بىلەن ئۆزرىلىك سانالمايدۇ. بۇنداق كىشى (ھەقتىن) يۈز ئۆرۈگۈچى، غەپلەتتە قالغۇچى ۋە بۇ مۇھىم ئىشلارغا سەل قارىغۇچى دەپ ئاتىلىدۇ، شۇڭا ئۇ ئۆزلىرىلىك بولالمايدۇ.

ئاللاھ سۇبھانەھۇ ۋەتائالا مۇنداق دەيدۇ: {أَمْ تَحْسَبُ أَنَّ أَكْثَرَهُمْ يَسْمَعُونَ أَوْ يَعْقِلُونَ إِنْ هُمْ إِلا كَالْأَنْعَامِ بَلْ هُمْ أَضَلُّ سَبِيلًا } «سەن ئۇلارنىڭ (يەنى كاپىرلارنىڭ) كۆپىنچىسىنى (ھەقنى) ئاڭلايدۇ ياكى چۈشىنىدۇ دەپ ئويلامسەن؟ ئۇلار پەقەت چارۋا ماللارغا ئوخشاشتۇر، بەلكى ئۇلاردىنمۇ بەتتەر ئازغۇندۇر.»

— فۇرقان سۈرىسى، 44-ئايەت

(بۇ ئايەتتە ئاللاھ ئازغۇن يولدىكىلەرنى بىلمىگەنلىكى سەۋەبلىك ئۆزرىلىك دەپ ھېسابلىماستىن، ئەكسىچە ئۇلارنىڭ بىلمەيدىغانلىقىنى بايان قىلىپ تۇرۇپ، ئاندىن ئۇلارغا ئازغۇنلۇق ھۆكمىنى بېرىۋاتىدۇ.)

ئاللاھ سۇبھانەھۇ ۋەتائالا يەنە مۇنداق دەيدۇ: {وَلَقَدْ ذَرَأْنَا لِجَهَنَّمَ كَثِيرًا مِنَ الْجِنِّ وَالْإِنْسِ لَهُمْ قُلُوبٌ لا يَفْقَهُونَ بِهَا وَلَهُمْ أَعْيُنٌ لا يُبْصِرُونَ بِهَا وَلَهُمْ آذَانٌ لا يَسْمَعُونَ بِهَا أُولَئِكَ كَالْأَنْعَامِ بَلْ هُمْ أَضَلُّ أُولَئِكَ هُمُ الْغَافِلُونَ} «بىز نۇرغۇن جىن ۋە ئىنسانلارنى دوزاخ ئۈچۈن ياراتتۇق، ئۇلارنىڭ دىللىرى بار تۇرۇپ، ئۇنىڭ بىلەن (ھەقنى) چۈشەنمەيدۇ؛ ئۇلارنىڭ كۆزلىرى بار تۇرۇپ، ئۇنىڭ بىلەن (ھەقنى) كۆرمەيدۇ؛ ئۇلارنىڭ قۇلاقلىرى بار تۇرۇپ، ئۇنىڭ بىلەن (ھەقنى) ئاڭلىمايدۇ؛ ئۇلار چارۋا ماللارغا ئوخشاشتۇر، بەلكى ئۇلاردىنمۇ بەتتەر ئازغۇندۇر. ئۇلار (ھەقنى كۆرۈش، بىلىش، چۈشىنىشتىن) غەپلەتتە قالغۇچىلاردۇر»

— ئەئراف سۈرىسى، 179-ئايەت

(بۇ ئايەتتە ئاللاھ ئەقىل ۋە كۆز – قۇلاقلىرىنى ھەقنى تونۇشقا سەرپ قىلمىغان كىشىلەرنىڭ بىلمەسلىكىنى، چۈشەنمەسلىكىنى ئۆزرە سانىماستىن، ئەكسىچە بۇنداقلارنىڭ دوزاخ ئۈچۈن يارتىلىغانلار ئىكەنلىكىنى بايان قىلدى.)

ئاللاھ سۇبھانەھۇ ۋەتائالا مۇشۇنداق كىشىلەر ھەققىدە يەنە مۇنداق دەيدۇ:

{إِنَّهُمُ اتَّخَذُوا الشَّيَاطِينَ أَوْلِيَاءَ مِنْ دُونِ اللَّهِ وَيَحْسَبُونَ أَنَّهُمْ مُهْتَدُونَ}

«ئۇلار ئاللاھنى قويۇپ شەيتانلارنى دوست تۇتتى. (شۇنداق تۇرۇقلۇق) ئۇلار ئۆزلىرىنى ھىدايەت تاپقۇچىلار دەپ گۇمان قىلىشىدۇ.»

— ئەئراف سۈرىسى، 30-ئايەت

ئاللاھ سۇبھانەھۇ ۋەتائالا مۇشۇنىڭغا ئوخشاش ئايەتلەردە زالىملارنى جاھىللىقى، (ھەقتىن) يۈز ئۆرۈگەنلىكى ۋە غەپلەتتە قالغانلىقى سەۋەبىدىن ئۆزرىلىك سانىمىغان.

ئەمما مۇسۇلمانلاردىن يىراقتا تۇغۇلۇپ چوڭ بولغان، مۇسۇلمانلار بولمىغان، قۇرئان ۋە سۈننەت خەۋىرى يەتمىگەن چەت ئەللەردە ياشايدىغان (ئۆزلىرىگە قۇرئان ۋە ئىسلام توغرۇلۇق ھېچقانداق خەۋەر يېتىپ كەلمىگەن) كىشىلەرگە كەلسەك، ئۇلار ئۆزرىلىكتۇر. ئەگەر ئۇلار مۇشۇ ھالەتتە ئۆلسە، ھۆكمى قىيامەت كۈنى ئىمتىھان قىلىنىدىغان «ئەھلى فەترەت»لەرنىڭ ھۆكمى بىلەن ئوخشاشتۇر. ئۇلاردىن كىمكى (قىيامەت كۈنىدىكى ئىمتىھاندا) چاقىرىققا جاۋاب بېرىپ، بۇيرۇققا ئىتائەت قىلسا جەننەتكە كىرىدۇ، كىمكى ئاسىيلىق قىلسا دوزاخقا كىرىدۇ.

ئەمما نامازنىڭ، زاكاتنىڭ ياكى ھەجنىڭ بەزى ئەھكاملىرىغا ئوخشاش، بەزىدە بەزى كىشىلەرگە يوشۇرۇن (مەخپىي) قالىدىغان مەسىلىلەردە، كىشى بىلمەسلىك سەۋەبىدىن ئۆزرىلىك سانىلىشى مۇمكىن. بۇنىڭدا ھېچقانداق تەرەددۇت يوق. چۈنكى بۇنداق مەسىلىلەر نۇرغۇن كىشىلەرگە نامەلۇم قالىدۇ. ھەممە ئادەم بۇ مەسىلىلەرنىڭ فىقھىي نازۇكلۇقلىرىنى بىلىپ كېتەلمەيدۇ، شۇڭا بۇ خىلدىكى مەسىلىلەرنىڭ ھۆكمى (ئەقىدە مەسىلىلىرىگە قارىغاندا) يېنىكرەكتۇر.

مۆمىن كىشىنىڭ دىنىنى ئۆگىنىشى، دىنىي بىلىملىرىنى چوڭقۇرلاشتۇرۇشى ۋە ئەھلى ئىلىملەردىن سورىشى ۋاجىپتۇر. ئاللاھ سۇبھانەھۇ ۋەتائالا مۇنداق دېگەن: {فَاسْأَلُوا أَهْلَ الذِّكْرِ إِنْ كُنْتُمْ لا تَعْلَمُونَ} «ئەگەر بىلمىسەڭلار، ئەھلى ئىلىملەردىن سوراڭلار» [نەھل سۈرىسى، 43-ئايەت]. رەسۇلۇللاھ سەللەللاھۇ ئەلەيھى ۋەسەللەمنىڭ بىلىمسىز پەتۋا بەرگەن بىر تۈركۈم كىشىلەرگە: «بىلمىگەن بولسا سورىسا بولمامدۇ؟ جاھىللىقنىڭ شىپاسى سوراشتۇر» دېگەنلىكى رىۋايەت قىلىنىدۇ. رەسۇلۇللاھ سەللەللاھۇ ئەلەيھى ۋەسەللەم مۇنداق دېگەن: ((من يرد الله به خيرا يفقهه في الدين)) «ئاللاھ كىمگە ياخشىلىق خالىسا، ئۇنى دىننى بىلىدىغان قىلىدۇ.»

شۇڭا مۇسۇلمان ئەر-ئاياللارنىڭ دىنىنى ئۆگىنىشى، ئۆزلىرىگە نائېنىق بولغان مەسىلىلەرنى سورىشى، جاھالەت – بىلىمسىزلىتە داۋام قىلماسلىقى، (ھەقتىن) يۈز ئۆرۈمەسلىكى ۋە غەپلەتتە قالماسلىقى ۋاجىپتۇر. چۈنكى ئۇلار ئاللاھقا ئىبادەت قىلىش ۋە ئاللاھقا ئىتائەت قىلىش ئۈچۈن يارىتىلغان، بۇنىڭغا ئىلىم-مەرىپەتسىز يەتكىلى بولمايدۇ. ئىلىم غەپلەت ۋە يۈز ئۆرۈش بىلەن قولغا كەلمەيدۇ، ئەكسىچە ئىلىم تەلەپ قىلىش بىلەن ۋە بىلمىگەنلەرنى ئۆگىنىش ئۈچۈن ئەھلى ئىلىملەردىن سوراش بىلەن قولغا كېلىدۇ.

مەنبە: شەيخ ئىبنى بازنىڭ پەتۋالار ۋە ماقالىلەر توپلىمى، 9-جىلد، 398-بەت

The post ئەقىدىدە مەسىلىلىرىدە جاھالەت (بىلمەسلىك) ئۆزۈر ھېسابلىنامدۇ؟ first appeared on مۇجتەھىد پەتىۋا تورى.

The post ئەقىدىدە مەسىلىلىرىدە جاھالەت (بىلمەسلىك) ئۆزۈر ھېسابلىنامدۇ؟ appeared first on مۇجتەھىد پەتىۋا تورى.

ئىمام ئىبنى باز رەھىمەھۇللاھ پەتىۋاسى

سوئال: بىر كىشى مۇنداق دەيدۇ: «ئىسلام ۋە ئىمان پەقەت رەسۇلۇللاھ سەللەللاھۇ ئەلەيھى ۋەسەللەمنىڭ پەيغەمبەرلىكى بىلەنلا چەكلەنمەيدۇ، بەلكى ئىسلام بىلەن ئىمان — مۇھەممەد ئەلەيھىسسالام ئەۋەتىلىشتىن بۇرۇن بولسۇن ياكى كېيىن بولسۇن — ئاللاھقا قانداقلا بىر سۈرەتتە ئىبادەت قىلغان بارلىق ئىنسانلارغا ئومۇمىيدۇر (يەنى شۇلارنىڭ ھەممىسى مۆمىن-مۇسۇلمان سانىلىدۇ).» بۇ قاراشقا نېمە دەيلا؟

جاۋاب:
مۇھەممەد سەللەللاھۇ ئەلەيھى ۋەسەللەم ئەۋەتىلىشتىن بۇرۇن، ئۆتكەنكى پەيغەمبەرلەرگە ئىمان ئېيتقانلارنىڭ ھەممىسى جەننەت ئەھلىدۇر. كىمكى مۇساغا، ئەيساغا، ھۇدقا، سالىھقا ۋە بارلىق پەيغەمبەرلەرگە ئىمان ئېيتىپ، شۇ ھالەتتە ئۆلگەن بولسا، ئۇ جەننەت ئەھلىدىن بولىدۇ.

ئەمما مۇھەممەد سەللەللاھۇ ئەلەيھى ۋەسەللەم ئەۋەتىلگەندىن كېيىن، مۇھەممەد سەللەللاھۇ ئەلەيھى ۋەسەللەمگە ئەگەشكەنلەردىن باشقا ھېچكىم جەننەتكە كىرەلمەيدۇ. رەسۇلۇللاھ ئەۋەتىلگەندىن كېيىن يەر يۈزىدىكى بارچە ئىنسانلارنىڭ ئۇ زاتقا ئىمان ئېيتىپ ئەگىشىشتىن باشقا نىجاتلىق يولى يوقتۇر. پەيغەمبەر ئەلەيھىسسالام مۇنداق دېگەن: ((كل أمَّتي يدخلون الجنة إلَّا مَن أبى)) «ئۈممىتىمنىڭ ھەممىسى جەننەتكە كىرىدۇ، پەقەت (كىرىشتىن) باش تارتقانلارلا كىرەلمەيدۇ». ساھابىلەر: «يا رەسۇلۇللاھ، باش تارتقۇچى كىم؟» دەپ سورىغاندا، رەسۇلۇللاھ: «كىم ماڭا ئىتائەت قىلسا جەننەتكە كىرىدۇ، كىم ماڭا ئاسىيلىق قىلسا (جەننەتكە كىرىشتىن) باش تارتقان بولىدۇ (يەنى دوزاخقا كىرىدۇ)» دېگەن.

ئەبۇ ھۇرەيرە ھەدىس سۆزلەپ،  رەسۇلۇللاھ سەللەللاھۇ ئەلەيھى ۋەسەللەمنىڭ مۇنداق دېگەنلىكىنى خەۋەر قىلغان: ((والذي نفسي بيده، لا يسمع بي أحدٌ من هذه الأمة: يهودي ولا نصراني، ثم يموت ولم يُؤمن بالذي أُرْسِلْتُ به إلَّا كان من أهل النار)) «جېنىم ئىلكىدە بولغان زات بىلەن قەسەمكى، بۇ ئۈممەتتىن (يەنى مېنىڭ زامانىمدىكى ئىنسانلاردىن) مەيلى يەھۇدى بولسۇن ياكى ناسارا بولسۇن، كىم مەن توغرۇلۇق ئاڭلاپ تۇرۇقلۇق، مەن ئەۋەتىلگەن دىنغا ئىمان ئېيتمىغان ھالەتتە ئۆلىدىكەن، ئۇ چوقۇم دوزاخ ئەھلىدىن بولىدۇ.» (مۇسلىم 153)

شۇڭا، مۇھەممەد سەللەللاھۇ ئەلەيھى ۋەسەللەم ئەۋەتىلگەندىن كېيىن، پەقەت ئۇنىڭغا ئەگەشكەنلەردىن باشقا ھېچكىم جەننەت ئەھلىدىن بولالمايدۇ. جەننەت ئەھلى بولىدىغانلار پەقەت رەسۇلۇللاھقا (مۇھەممەد سەللەللاھۇ ئەلەيھى ۋەسەللەمگە) ئەگەشكەنلەردۇر. ئەمما كىمگە ئۇنىڭ خەۋىرى يېتىپ تۇرۇپ، ئۇنى ئىنكار قىلسا ۋە ئىمان ئېيتمىسا، ئۇ دوزاخ ئەھلىدىن بولىدۇ.

ئەمدى رەسۇلۇللاھ سەللەللاھۇ ئەلەيھى ۋەسەللەمنىڭ خەۋىرى يەتمىگەن، پەيغەمبەر ھەققىدە ۋە قۇرئان ھەققىدە ئاڭلىمىغان «ئەھلى فەترەت» (دەۋەت يەتمىگەنلەر) گە كەلسەك، ئۇلارنىڭ ئىشى قىيامەت كۈنى ئاللاھ تائالاغا تاپشۇرۇلىدۇ. ئاللاھ ئۇلارنى قىيامەتتە ئىمتىھان قىلىدۇ. كىم ئىمتىھاندىن ئۆتسە (ئىتائەت قىلسا) جەننەتكە كىرىدۇ، كىم ئۆتەلمىسە دوزاخقا كىرىدۇ. ئاللاھتىن سالامەتلىك تىلەيمىز.

ئەمما كىمگە رەسۇلۇللاھ سەللەللاھۇ ئەلەيھى ۋەسەللەمنىڭ خەۋىرى يېتىپ كەلگەن، قۇرئان  يېتىپ كەلگەن تۇرۇپمۇ ئىمان ئېيتمىسا، ئۇ دوزاخ ئەھلىدىن بولىدۇ. ئاللاھتىن ئامانلىق تىلەيمىز.

— مۇجتەھىد تورى تەرجىمە قىلىپ تارقاتتى

مەنبە: https://binbaz.org.sa/fatwas/3045/حكم-من-بلغته-رسالة-الاسلام-ولم-يدخل-فيه

The post ئىسلام يېتىپ كەلگەن تۇرۇپ، ئۇنىڭغا كىرمىگەنلەرنىڭ ھۆكمى | ئىمام ئىبنى باز پەتىۋاسى first appeared on مۇجتەھىد پەتىۋا تورى.

The post ئىسلام يېتىپ كەلگەن تۇرۇپ، ئۇنىڭغا كىرمىگەنلەرنىڭ ھۆكمى | ئىمام ئىبنى باز پەتىۋاسى appeared first on مۇجتەھىد پەتىۋا تورى.

سۇئال: دىننىڭ جەۋھىرى (ئۆزى) بولغان تەۋھىد مەسىلىلىرىدە بىلمەسلىك (جاھالەت) سەۋەبلىك شىرككە چۈشكەن كىشىگە ئۆزۈر بارمۇ؟ شىرك ئەمەللەرنى بىلمەستىن سادىر قىلغان شەخسنى «كاپىر» دېيىشنىڭ ھۆكمى نېمە؟

جاۋاب: مۇسۇلمانلار ئارىسىدا ياشىغان كىشىنىڭ تەۋھىد مەسىلىسىدە جاھالەت (بىلمەسلىك) ئۆزرىسى يوقتۇر. ئەمما مۇسۇلمانلاردىن يىراقتا ياشايدىغان ۋە تەۋھىدتىن خەۋەرسىز كىشىلەرنىڭ ئىشى ئاللاھقا تاپشۇرۇلىدۇ. ئۇلارنىڭ ھۆكمى قىيامەت كۈنى ئىمتىھان قىلىنىدىغان «ئەھلى فەترەت»لەرنىڭ ھۆكمى بىلەن ئوخشاشتۇر.

لېكىن، مۇسۇلمانلار ئارىسىدا ياشاپ تۇرۇپ، ئاللاھنىڭ ۋە رەسۇلىنىڭ سۆزلىرىنى ئاڭلاپ تۇرۇپمۇ، ئۇنىڭغا پىسەنت قىلمىغان، كۆڭۈل بۆلمىگەن، قەبرىلەرگە چوقۇنغان، ئۇلاردىن مەدەت سورىغان كىشى كاپىردۇر. شۇنداقلا دىننى تىللىغان كىشىمۇ كاپىردۇر. بۇ خىل كىشىلەرگە ئېنىق رەۋىشتە كاپىر دەپ ھۆكۈم قىلىنىدۇ. مەسىلەن، سىزنىڭ «پالانى كاپىر» دېگىنىڭىزگە ئوخشاش. مۇسۇلمان ھۆكۈمرانلار بۇنداق كىشىنى تەۋبىگە چاقىرىشى كېرەك. ئەگەر تەۋبە قىلسا (ياخشى)، بولمىسا كاپىرلىقى يۈزىسىدىن ئۆلتۈرۈلىدۇ.

دىننى مەسخىرە قىلغان، ياكى ئاللاھ ھارام قىلغان نەرسىنى — مەسىلەن، زىنا ھالال، ھاراق ھالال دېيىش، ئىنسانلار تۈزگەن قانۇنلار بىلەن ھۆكۈم قىلىش ھالال دەپ بىلىش، ئاللاھ نازىل قىلغان ھۆكۈمدىن باشقىسى بىلەن ھۆكۈم قىلىش ھالال ياكى ئۇنى ئاللاھنىڭ ھۆكمىدىن ئەۋزەل دەپ بىلگەن كىشىمۇ شۇنىڭغا ئوخشاش كاپىر بولىدۇ. بۇلارنىڭ ھەممىسى ئىسلامدىن چىقىپ كېتىش (مۇرتەدلىك) تۇر، بۇنداق بولۇپ قېلىشتىن ئاللاھتىن پاناھ تىلەيمىز.

شۇڭا ھەر بىر ئىسلام ھۆكۈمىتىنىڭ ئاللاھنىڭ شەرىئىتى بىلەن ھۆكۈم قىلىشى، پۇقرالار ئىچىدىن ئىسلامنى بۇزىدىغان (ناۋاقىزۇل ئىسلام) ئەمەل سادىر قىلغانلارنى تەۋبىگە چاقىرىشى ۋاجىپتۇر. ئەگەر تەۋبە قىلسا (قوبۇل قىلىنىدۇ)، بولمىسا ئۆلتۈرۈلۈشى ۋاجىپتۇر. چۈنكى پەيغەمبەر ئەلەيھىسسالام: ((من بدل دينه فاقتلوه)) «كىمكى دىنىنى ئۆزگەرتسە (مۇرتەد بولسا)، ئۇنى ئۆلتۈرۈڭلار» دېگەن (بۇخارى رىۋايىتى). «سەھىھەين»دە (بۇخارى ۋە مۇسلىمدا) كەلگەن رىۋايەتتە، مۇئاز ئىبنى جەبەل رەزىيەللاھۇ ئەنھۇ بەزى ۋالىيلارغا مۇرتەد تەۋبە قىلمىسا ئۆلتۈرۈشنى بۇيرۇپ: «بۇ ئاللاھنىڭ ۋە رەسۇلىنىڭ ھۆكمىدۇر» دېگەن.

ئاللاھنىڭ ھۆكمى ئىلىم ۋە بەسىيرەت بىلەن، مەسئۇللارنىڭ ۋاسىتىسى ئارقىلىق ئىجرا قىلىنىشى ئۈچۈن بۇ جازالار چوقۇم ھۆكۈمران (ۋەلىييۇل ئەمر) ۋە شەرىئەت مەھكىمىلىرى ئارقىلىق ئېلىپ بېرىلىشى ۋاجىپتۇر. ئاللاھ ھەممىمىزنىڭ ئەھۋالىنى ئوڭشىسۇن، ئۇ ھەقىقەتەن (دۇئالارنى) ئاڭلىغۇچى، (بەندىلىرىگە) يېقىندۇر.

— مۇجتەھىد تورى تەرجىمە قىلىپ تارقاتتى

مەنبە: شەيخ ئىبنى بازنىڭ پەتۋالار ۋە ماقالىلەر توپلىمى، 9-جىلد، 79-بەت

https://binbaz.org.sa/fatwas/2351/امور-التوحيد-لا-عذر-فيها

The post تەۋھىد مەسىلىسىدە جاھالەتكە ئۆزۈر يوق | ئىمام ئىبنى باز پەتىۋاسى first appeared on مۇجتەھىد پەتىۋا تورى.

The post تەۋھىد مەسىلىسىدە جاھالەتكە ئۆزۈر يوق | ئىمام ئىبنى باز پەتىۋاسى appeared first on مۇجتەھىد پەتىۋا تورى.

سۇئال: بىر كىشى قىلغان ئەمىلىنىڭ شىرك ئىكەنلىكىنى بىلمەستىن شىرك ئۈستىدە ئۆلۈپ كەتكەن بولسا، ئۇنىڭ ھۆكمى نېمە؟

جاۋاب: شىرك ئۈستىدە ئۆلگەن كىشى ئىنتايىن خەتەرلىك ئەھۋالدا قالىدۇ. چۈنكى ئاللاھ سۇبھانەھۇ ۋەتائالا مۇنداق دەيدۇ: {وَلَوْ أَشْرَكُوا لَحَبِطَ عَنْهُمْ مَا كَانُوا يَعْمَلُونَ} «ئەگەر ئۇلار شېرىك كەلتۈرسە، قىلغان ئەمەللىرى ئەلۋەتتە بىكار بولۇپ كېتىدۇ.» [ئەنئام سۈرىسى، 88-ئايەت]

ئاللاھ يەنە مۇنداق دەيدۇ: {مَا كَانَ لِلْمُشْرِكِينَ أَنْ يَعْمُرُوا مَسَاجِدَ اللَّهِ شَاهِدِينَ عَلَى أَنْفُسِهِمْ بِالْكُفْرِ أُولَئِكَ حَبِطَتْ أَعْمَالُهُمْ وَفِي النَّارِ هُمْ خَالِدُونَ} «مۇشرىكلار ئۆزلىرىنىڭ كاپىرلىقىنى بىلىپ تۇرۇپ، ئاللاھنىڭ مەسجىدلىرىنى ئاۋات قىلىشقا ھەقلىق ئەمەس، ئۇلارنىڭ ئەمەللىرى بىكار بولدى، ئۇلار دوزاختا مەڭگۈ قالغۇچىلاردۇر.» [تەۋبە سۈرىسى، 17-ئايەت]

ئاللاھ يەنە مۇنداق دەيدۇ: {وَقَدِمْنَا إِلَى مَا عَمِلُوا مِنْ عَمَلٍ فَجَعَلْنَاهُ هَبَاءً مَنْثُورًا} «بىز ئۇلار قىلغان ئەمەللەرگە (يەنى ياخشى ئەمەللىرىگە) يۈزلىنىمىز-دە، ئۇنى توزۇغان چاڭ-توزانغا ئايلاندۇرۇپ قويىمىز.» [فۇرقان سۈرىسى، 23-ئايەت]

ئاللاھ يەنە مۇنداق دەيدۇ: {إِنَّ اللَّهَ لا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ} «ئاللاھ ئۆزىگە شېرىك كەلتۈرۈلۈشىنى (تەۋبىسىز ئۆلسە) كەچۈرمەيدۇ، ئۇنىڭدىن باشقىسىنى (خالىغان كىشى ئۈچۈن) كەچۈرىدۇ.» [نىسا سۈرىسى، 48-ئايەت]

مانا بۇلار (چوڭ شىرك ئۈستىدە ئۆلگەنلەر) نىڭ ئاگاھلاندۇرۇلۇشى ۋە ئاقىۋىتى بولۇپ، ئۇلارنىڭ ئورنى باشقا چوڭ كۇفرى سادىر قىلغان كاپىرلارنىڭ ئورنى بىلەن ئوخشاشتۇر. شىرك سادىر قىلغانلارنىڭ بۇ دۇنيادىكى ھۆكمىگە كەلسەك، ئۇلار يۇيۇلمايدۇ، جىنازا نامىزى ئوقۇلمايدۇ ۋە مۇسۇلمانلارنىڭ قەبرىستانلىقىغا دەپنە قىلىنمايدۇ.

ئەمما ئۇلارنىڭ ئىچىدە كىمگە دەۋەت — يەنى قۇرئان ۋە سۈننەت — يەتمىگەن بولسا، ئۇنىڭ ئىشى قىيامەت كۈنى باشقا «ئەھلى فەترەت» (پەيغەمبەرلەر ئارىلىقىدىكى دەۋەت يەتمىگەنلەر) گە ئوخشاش ئاللاھنىڭ ئىرادىسىگە تاپشۇرۇلىدۇ. ئەھلى ئىلىملەرنىڭ بۇ ھەقتىكى ئەڭ كۈچلۈك قارىشى شۇكى، ئۇلار قىيامەتتە ئىمتىھان قىلىنىدۇ. كىم بۇيرۇققا ئىتائەت قىلسا جەننەتكە كىرىدۇ، كىم ئاسىيلىق قىلسا دوزاخقا كىرىدۇ.

بۇ مەسىلىنى كاتتا ئالىم ئىبنى قەييىم رەھىمەھۇللاھ ئۆزىنىڭ «تەرىقۇل ھىجرەتەين» (طريق الهجرتين) ناملىق كىتابىنىڭ ئاخىرىدا تەپسىلىي بايان قىلىپ مۇنداق دېگەن: «(سەككىزىنچى قاراش:) ئۇلار قىيامەت مەيدانىدا ئىمتىھان قىلىنىدۇ، ئۇ يەردە ئۇلارغا ۋە دەۋەت يەتمىگەن بارلىق كىشىلەرگە بىر ئەلچى ئەۋەتىلىدۇ. كىم ئەلچىگە ئىتائەت قىلسا جەننەتكە كىرىدۇ، كىم ئاسىيلىق قىلسا دوزاخقا كىرىدۇ. بۇنىڭ بىلەن ئۇلارنىڭ بىر قىسمى جەننەتتە، بىر قىسمى دوزاختا بولىدۇ، مانا مۇشۇ قاراش بارلىق دەلىللەرنى بىر-بىرىگە ماسلاشتۇرىدۇ.»

ئەمما كىمدە-كىم ئۆزى سادىر قىلغان شىرك مەسىلىسىدە جاھالەت ئىچىدە بولغان بولسا، ئۇنىڭ ئىشى ئاللاھ تائالاغا تاپشۇرۇلىدۇ. ئەمما دۇنيادىكى ھۆكۈم زاھىرغا (سىرتقى كۆرۈنۈشكە) ئاساسەن چىقىرىلىدۇ. كىمنىڭ زاھىرى شىرك بولسا، ئۇنىڭ ھۆكمى مۇشرىكلارنىڭ ھۆكمى بىلەن ئوخشاشتۇر. ئۇنىڭ (ئىچكى ئەھۋالى ۋە ئاخىرەتلىك) ئىشى بولسا ھەممە نەرسىنى بىلگۈچى ئاللاھ سۇبھانەھۇ ۋەتائالاغا تاپشۇرۇلىدۇ.

— مۇجتەھىد تورى تەرجىمە قىلىپ تارقاتتى

مەنبە: شەيخ ئىبنى بازنىڭ 1416-يىلى 8-ئاينىڭ 13-كۈنى جىددە شەھىرىدىكى ئەمىر مۇتئەب بىن ئابدۇلئەزىز مەسجىدىدە بەرگەن «قۇرئان كەرىم بىلەن ۋەسىيەت قىلىش» ناملىق لېكسىيەسىدىن كېيىن سورالغان سوئاللارغا بەرگەن جاۋابى. (شەيخ ئىبنى بازنىڭ پەتۋالار ۋە ماقالىلەر توپلىمى، 9-جىلد، 39-بەت)

The post قىلغان ئەمەلىنىڭ شىرك ئىكەنلىكىنى بىلمەي، شىرك ئۈستىدە ئۆلگەن كىشىنىڭ ھۆكمى | ئىمام ئىبنى باز پەتىۋاسى first appeared on مۇجتەھىد پەتىۋا تورى.

The post قىلغان ئەمەلىنىڭ شىرك ئىكەنلىكىنى بىلمەي، شىرك ئۈستىدە ئۆلگەن كىشىنىڭ ھۆكمى | ئىمام ئىبنى باز پەتىۋاسى appeared first on مۇجتەھىد پەتىۋا تورى.

سۇئال: مۇسۇلمانلاردىن تەۋھىدنىڭ ھەقىقىتىنى بىلمەستىن ئاللاھتىن باشقىغا دۇئا قىلىدىغانلارنىڭ ھۆكمى نېمە؟

پەتىۋا بەرگۈچى: ئىمام ئىبنى باز رەھىمەھۇللاھ

جاۋاب: بۇلارنىڭ ھۆكمى شۇكى، ئۇلارنىڭ بۇ ئەمىلى كۇفۇردۇر (كاپىرلىقتۇر). ئۆلۈكلەرگە دۇئا قىلىدىغان ۋە ئۆلۈكلەردىن مەدەت سورايدىغانلارنىڭ قىلغىنى كۇفرى ئەمەلدۇر. ئۆلىمالار بۇ مەسىلىدە، يەنى شۇ كىشىنىڭ ئۆزى كاپىر ھېسابلىنامدۇ ياكى چوقۇم (ھەقنى) بىلىشى شەرت بولامدۇ؟ دېگەن مەسىلىدە ئىككى خىل قاراشتا بولغان:

بىرىنچى قاراش: چوقۇم (ھەقنى) بىلىشى شەرت. چۈنكى ئۇ باتىلغا چاقىرغۇچىلار ۋە ناچار ئالىملار يۈزىسىدىن بۇ مەسىلىدە قايمۇقۇشقا چۈشۈپ قالغان بولۇشى مۇمكىن. شۇڭا، ئۇنىڭغا كافىر دەپ ھۆكۈم چىقىرىشتىن بۇرۇن، چوقۇم ئىشنىڭ ھەقىقىتى ئۇنىڭغا ئۆگىتىلىشى ۋە ئاگاھلاندۇرۇلۇشى شەرت. بۇ بىر تۈركۈم ئەھلى ئىلىملەرنىڭ قارىشىدۇر.

ئىككىنچى قاراش: ھېچقانداق رەۋىشتە بايان قىلىپ ئۆگىتىشكە ئېھتىياج يوق. چۈنكى مەسىلە ناھايىتى ئېنىق، قۇرئاننىڭ ھەممە يېرىدە شىرك بايان قىلىنغان، سۈننەتتىمۇ شىركنىڭ بايانى ئوچۇق مەۋجۇت. ئۆلىمالارمۇ بۇنى بايان قىلغان. شۇڭا ئۇنىڭ كاپىر بولۇشى ئۆگىتىشكە باغلىق ئەمەس، شۇڭا ئاللاھتىن باشقىسىغا دۇئا قىلغان كىشى مۇشۇ ئەمىلى بىلەنلا مۇشرىك كاپىر بولۇپ كېتىدۇ.

لېكىن، ئەگەر ئۇنى سوراققا تارتىدىغان بىر ئىسلام دۆلىتى بولسا، ئۇنى جازالاشتىن بۇرۇن تەۋبىگە چاقىرىدۇ. ئۇنىڭغا: «ئاللاھقا تەۋبە قىل، بۇ شىركتىن ۋاز كەچ» دېيىلىدۇ. ئەگەر تەۋبە قىلىپ ۋاز كەچسە ئەلھەمدۇلىللاھ، ئەمما چىڭ تۇرۇۋالسا ئۆلتۈرۈلىدۇ.

قانداقلا بولمىسۇن، مەسىلە ناھايىتى خەتەرلىك. بۇنداق ئەمەللەرنى سادىر قىلىش بىلەنلا (ئۇ كىشىنى) «كاپىر» دەپ ھۆكۈم قىلىش كۈچلۈك بىر قاراشتۇر. لېكىن، ئېھتىيات يۈزىسىدىن، تاكى ئۇ كىشىگە ھەق يەتكۈزۈلۈپ، ياخشىلىققا يېتەكلىنىپ ۋە (بۇ ھەقتىكە توغرا ئەقىدە) ئۆگىتىلمىگۈچە، بۇ ھۆكۈمگە ئالدىرىماسلىق كېرەك. ئەگەر ئىمكانىيەت بولسا، بەلكىم ئۇ كىشى (ھەقنى ئاڭلىسا) ھىدايەت تېپىپ قالار. ئەمما، مادامىكى كاپىرلارنىڭ ئەمىلىنى قىلىۋاتقان ئىكەن، ئۇنىڭ بۇ دۇنيادىكى ھۆكمى كاپىرلارنىڭ ھۆكمى بىلەن ئوخشاش بولۇپ، ئاللاھتىن باشقىغا دۇئا قىلىدىغان ھالەتتە ئۆلگەن كىشىنىڭ جىنازا نامىزى ئوقۇلمايدۇ، يۇيۇلمايدۇ ۋە مۇسۇلمانلار ئۇنىڭدىن مىراس ئالمايدۇ.

— مۇجتەھىد تورى تەرجىمە قىلىپ تارقاتتى | mujtehid.com

https://binbaz.org.sa/fatwas/1210/حكم-دعاء-غير-الله-عن-جهل-بالتوحيد

The post تەۋھىدنىڭ ھەقىقىتىنى بىلمەي ئاللاھتىن باشقىغا دۇئا قىلىشنىڭ ھۆكمى first appeared on مۇجتەھىد پەتىۋا تورى.

The post تەۋھىدنىڭ ھەقىقىتىنى بىلمەي ئاللاھتىن باشقىغا دۇئا قىلىشنىڭ ھۆكمى appeared first on مۇجتەھىد پەتىۋا تورى.

ئىمام ئىبنى باز پەتىۋاسى

مۇجتەھىد تورى تەرجىمە قىلىپ تارقاتتى

سۇئال: بىر مۇسۇلمان ئاللاھتىن باشقىغا ئاتاپ قۇربانلىق قىلىش ياكى نەزىر قىلىشقا ئوخشاش شىرك ئەمەللەرنى سادىر قىلسا، ئۆزۈرلۈك سانىلامدۇ؟

جاۋاب: بۇ جەھەتتىكى ھۆكۈم ئىككى تۈرلۈكتۇر. (1) جاھالەت (بىلمەسلىك) سەۋەبلىك ئۆزرىلىك سانىلىدىغان ئىشلار. (2) جاھالەت (بىلمەسلىك) سەۋەبلىك ئۆزرىلىك سانالمايدىغان ئىشلار.

ئەگەر يۇقىرىقىدەك شىرك ئەمەلنى سادىر قىلغۇچى مۇسۇلمانلار ئارىسىدا ياشايدىغان تۇرۇپ، ئاللاھقا شېرىك كەلتۈرسە ياكى ئاللاھتىن باشقىغا ئىبادەت قىلسا، ئۇ سەل قارىغانلىقى، (ھەقنى) سورىمىغانلىقى ۋە دىنىي مەسىلىلەردە بەسىيرەتلىك بولۇشقا تىرىشمىغانلىقى يۈزىسىدىن، قىلغان شىرك ئەمىلىدە ئۆزۈرلۈك ھېسابلانمايدۇ. شۇڭا ئۆلۈكلەرگە، دەرەخلەرگە، تاشلارغا ياكى بۇتلارغا ئىبادەت قىلىش مەسىلىسىدە ئۇ كىشى ئۆزۈرلۈك بولالمايدۇ. چۈنكى ئۇ ھەقتىن يۈز ئۆرۈگەن ۋە غەپلەتتە قالغاندۇر. ئاللاھ سۇبھانەھۇ ۋەتائالا مۇنداق دېگەن: {وَالَّذِينَ كَفَرُوا عَمَّا أُنْذِرُوا مُعْرِضُونَ} «كاپىرلار ئۆزلىرى ئاگاھلاندۇرۇلغان نەرسىدىن يۈز ئۆرۈگۈچىلەردۇر.» [ئەھقاف سۈرىسى، 3-ئايەت]

يەنە بىر دەلىل شۇكى، پەيغەمبەر ئەلەيھىسسالام ئاللاھتىن ئانىسى ئۈچۈن مەغپىرەت تىلەشكە رۇخسەت سورىغاندا، ئاللاھ ئۇنىڭغا مەغپىرەت تىلەشكە رۇخسەت قىلمىغان. چۈنكى رەسۇلۇللاھنىڭ ئانىسى ئۆز قەۋمىنىڭ دىنىدا — يەنى بۇتلارغا چوقۇنىدىغان ھالەتتە ئۆلگەن ئىدى. يەنە بىر دەلىل، پەيغەمبەر ئەلەيھىسسالام ئۆز ئاتىسى ھەققىدە سورىغان بىر كىشىگە: «ئۇ دوزاختىدۇر» دېگەن. سۇئال سورىغۇچىنىڭ چىرايىدىكى قايغۇنى كۆرگەندىن كېيىن: «شۈبھىسىزكى، مېنىڭ ئاتاممۇ، سېنىڭ ئاتاڭمۇ دوزاختىدۇر» دېگەن. (يەنى ئۇلار مۇسۇلمانلار ئارىسىدا بولمىسىمۇ، ھەق دىن كېلىشتىن بۇرۇن بۇتلارغا چوقۇنۇپ ئۆلگەنلىكى ئۈچۈن ئۆزرىلىك سانالمىغان).

چۈنكى رەسۇلۇللاھنىڭ دادىسى ئاللاھقا شېرىك كەلتۈرگەن، ئاللاھ سۇبھانەھۇ ۋەتائالادىن باشقىغا ئىبادەت قىلغان ھالەتتە ئۆلگەن. (ئەھۋال شۇنداق ئىكەن)، مۇسۇلمانلار ئارىسىدا ياشاپ تۇرۇپ بەدەۋىيگە، ھۈسەيىنگە، ئابدۇلقادىر جەيلانىيغا، مۇھەممەد سەللەللاھۇ ئەلەيھى ۋەسەللەمگە، ئەلىگە ياكى باشقىلارغا (ئۇلاردىن ھاجەت تىلەش، ئۇلارنى دۇنيانىڭ ئىشلىرىنى تەسەررۇپ قىلالايدۇ دەپ ئېتىقاد قىلىش ئارقىلىق) ئىبادەت قىلىۋاتقانلارنىڭ ئەھۋالى قانداق بولار؟

مانا مۇشۇنداق كىشىلەر ۋە ئۇلارغا ئوخشاشلارنىڭ ئۆزرىسى رەسۇلۇللاھنىڭ ئانىسىنىڭ ۋە دادىسىنىڭ ئۆزرىسى قوبۇل قىلىنمىغىندىنمۇ بەكرەك قوبۇل قىلىنمايدۇ. چۈنكى بۇ خىل كىشىلەر مۇسۇلمانلارنىڭ ئارىسىدا ياشاپ تۇرۇپ، قۇرئان كەرىم كۆز ئالدىدا (قولىدا) تۇرۇقلۇق چوڭ شىرك سادىر قىلغانلاردۇر. شۇنىڭدەك رەسۇلۇللاھ  سەللەللاھۇ ئەلەيھى ۋەسەللەمنىڭ سۈننىتىمۇ ئۇلارنىڭ ئارىسىدا مەۋجۇت، ئەمما ئۇلار قۇرئان ۋە سۈننەتتىكى شىركتىن ئۇزاق تۇرۇش بۇيرۇقىنى چۈشىنىشتىن ۋە ئۇلارغا رىئايە قىلىشتىن يۈز ئۆرۈمەكتىدۇر.

ئىككىنچى تۈردىكىلەر بولسا، جاھىللىق (بىلمەسلىك) سەۋەبلىك ئۆزرىلىك سانىلىدىغانلاردۇر. مەسىلەن، دۇنيانىڭ چەت جايلىرىدا، ئىسلامدىن يىراق ئەللەردە چوڭ بولغانلار ياكى باشقا سەۋەبلەر بىلەن دەۋەت يەتمىگەن «ئەھلى فەترەت»كە (پەيغەمبەرلەر ئارىلىقىدىكى دەۋر كىشىلىرىگە) ئوخشاشلار. بۇلار جاھالىتى سەۋەبلىك ئۆزرىلىك سانىلىدۇ، ئۇلارنىڭ ئىشى ئاللاھ تائالاغا تاپشۇرۇلىدۇ.

توغرا قاراش شۇكى، قىيامەت كۈنى ئۇلاردىن ئىمتىھان قىلىنىدۇ (يەنى ئۇلارغا بۇيرۇق بېرىلىدۇ)؛ ئەگەر ئىتائەت قىلسا جەننەتكە كىرىدۇ، ئەگەر ئاسىيلىق قىلسا دوزاخقا كىرىدۇ. بۇنىڭ دەلىلى ئاللاھ تائالانىڭ:  {وَمَا كُنَّا مُعَذِّبِينَ حَتَّى نَبْعَثَ رَسُولًا} «بىز پەيغەمبەر ئەۋەتمىگۈچە (ھېچكىمگە) ئازاب قىلمايمىز.» [ئىسرا سۈرىسى، 15-ئايەت] دېگەن سۆزى ۋە بۇ ھەقتە كەلگەن سەھىھ ھەدىسلەردۇر.

كاتتا ئالىم ئىبنى قەييىم رەھىمەھۇللاھ ئۆزىنىڭ «تەرىقۇل ھىجرەتەين» (طريق الهجرتين) ناملىق كىتابىنىڭ ئاخىرىدا، مۇكەللەپلەرنىڭ (مەسئۇلىيەت ئىگىلىرىنىڭ) تەبىقەلىرىنى زىكىر قىلغاندا، بۇ مەسىلىنى ئىنتايىن تەپسىلىي بايان قىلغان؛ پايدىسىنىڭ كاتتىلىقى يۈزىسىدىن، تېخىمۇ تەپسىلىي چۈشەنچىگە ئىگە بولماقچى بولغانلارنىڭ شۇ ئەسەرگە مۇراجىئەت قىلىشى تەۋسىيە قىلىنىدۇ.» (مجموع فتاوى ومقالات الشيخ ابن باز: 4/ 26)

The post شىرك ئەمەل سادىر قىلغان كىشى قاچان ئۆزۈرلۈك ھېسابلىنىدۇ؟ | ئىمام ئىبنى باز پەتىۋاسى first appeared on مۇجتەھىد پەتىۋا تورى.

The post شىرك ئەمەل سادىر قىلغان كىشى قاچان ئۆزۈرلۈك ھېسابلىنىدۇ؟ | ئىمام ئىبنى باز پەتىۋاسى appeared first on مۇجتەھىد پەتىۋا تورى.